Halkara maglumat hukugyny öwrenmäge bagyşlanan onlaýn duşuşygy
2022-nji ýylyň 20-nji aprelinde Russiýa Federasiýasynyň Astrahan döwlet uniwersiteti bilen Türkmenistanyň Daşary işler ministrliginiň Halkara gatnaşyklary institutynyň arasynda göni wideoaragatnaşyk arkaly “Internet aragatnaşygynyň täze ulgamynda halkara hukugynyň möhüm meseleleri: nazaryýet we tejribe” atly tegelek stol geçirildi. Bu çärä Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň mugallymlary, talyplary we magistrantlary gatnaşdylar.
Duşuşykda Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 4-nji ýyl talyby Atajan Rozybaýew “Adamzadyň ösüşiniň häzirki zaman tapgyrynda kiberhowpsuzlygyň orny” atly tema boýunça çykyş etdi.
Duşuşykda kanuny kadalaşdyrmak we maglumat giňişligini, şol sanda internet ulgamyny ulanmak ýaly halkara maglumat hukugynyň derwaýys meseleleri boýunça pikir alşyldy.
Duşuşygyň ahyrynda oňa gatnaşyjylar iki ýokary okuw mekdebiniň arasynda geçirilýän onlaýn duşuşyklarynyň ýygy-ýygydan gurnalyp durulmagynyň, şeýle-de halkara hukugynyň dürli ugurlarynyň ylmy taýdan öwrenmekliginiň uly ähmiýetiniň bardygyny nygtadylar.
Şagül AŞYROWA,
Türkmenistanyň Daşary işler ministrliginiň
Halkara gatnaşyklary institutynyň
“Halkara hususy hukugy” ugry boýunça magistranty.