Halkara hyzmatdaşlyga bagyşlanan tegelek stol
2022-nji ýylyň 27-nji dekabrynda Türkmenistanyň Daşary işler ministrliginiň Halkara gatnaşyklary institutynyň okuw studiýasynda Türkmenistanyň köptaraplaýyn gatnaşyklaryna hem-de halkara guramalary bilen alyp barýan hyzmatdaşlygyna bagyşlanan tegelek stol duşuşygy geçirildi. Oňa Türkmenistanyň daşary ýurtlardaky diplomatik wekilleri gatnaşdylar.
Duşuşygy institutyň ylmy işler boýunça prorektory B.Mätliýew alyp bardy. Ol öz gezeginde ýurdumyzyň sebit we dünýä ýurtlary hem-de halkara guramalary bilen alyp barýan netijeli hyzmatdaşlygy dogrusynda belläp, ýola goýlan ylym, bilim ugurly hyzmatdaşlygyň has-da ýokary derejelere eýe bolýandygyny nygtady. Şeýle-de Berkarar döwletiň täze eýýamynyň Galkynyşy döwründe hormatly Prezidentimiziň oýlanyşykly içeri hem-de daşary syýasaty netijesinde, Türkmenistan döwletimiziň ýeten täze sepgitleri, oňyn gatnaşyklary, ylalaşdyryjy, hoşniýetli ýörelgeleri, ýurdumyzyň abraýly halkara guramalarynyň wekilleri bilen geçiren duşuşyklary barada belledi.
Duşuşygyň barşynda Türkmenistanyň Şweýsariýa Konfederasiýasyndaky Adatdan daşary we Doly ygtyýarly ilçisi, BMG-niň Ženewadaky edarasynyň ýanyndaky Türkmenistanyň hemişelik wekili Atageldi Haljanow, Türkmenistanyň Fransiýa Respublikasyndaky Adatdan daşary we Doly ygtyýarly Ilçisi, Türkmenistanyň ÝUNESKO-nyň ýanyndaky hemişelik wekili Maksat Çaryýew, Türkmenistanyň Belgiýa Patyşalygyndaky Adatdan daşary we Doly ygtyýarly Ilçisi Sapar Pälwanow, Türkmenistanyň Awstriýa Respublikasyndaky Adatdan daşary we Doly ygtyýarly Ilçisi, ÝHHG-niň ýanyndaky Türkmenistanyň hemişelik wekili Hemra Amannazarow, şeýle-de Türkmenistanyň Belarus Respublikasyndaky Adatdan daşary we Doly ygtyýarly Ilçisi, GDA-nyň tertipnamalaýyn we beýleki edaralarynyň ýanyndaky Türkmenistanyň hemişelik wekili Nazarguly Şagulyýew dagy çykyş etdi.
Olar öz gezeginde Türkmenistanyň Birleşen Milletler Guramasy, ÝUNESKO, Ýewropa Bileleşigi, Ýewropada Howpsuzlyk we Hyzmatdaşlyk Guramasy, şeýle hem Garaşsyz Döwletleriň Arkalaşygy bilen hyzmatdaşlyklary dogrusynda giňişleýin gürrüň berdiler.
Häzirki wagtda Türkmenistan dünýäniň ähli döwletleri bilen açyklyga we özara bähbitli gatnaşyklara esaslanýan daşary syýasaty alyp barýar. Gahryman Arkadagymyzyň, hormatly Prezidentimiziň dostluk we hoşniýetlilik esasynda alyp barýan daşary syýasatynyň netijesinde Türkmenistan dünýäde mynasyp orun eýeläp, ählumumy abadançylygyň we howpsuzlygyň hatyrasyna ylalaşdyryjylygyň we ynanyşmagyň dünýä jemgyýetçiligi tarapyndan ykrar edilen merkezine öwrüldi. Ýurdumyz halkara guramalaryň 50-siniň agzasy bolmak bilen, olaryň köptaraply alyp barýan işlerine işjeň gatnaşýar. Olar bilen bilelikde bilimi, medeniýeti, söwda-ykdysady, saglygy goraýşy, daşky gurşawy we beýleki ugurlary ösdürmek ugrundaky maksatnamalary amala aşyrýar.
Türkmenistan iri halkara guramalar, hususan-da, BMG we düzümleri bilen hyzmatdaşlyk etmäge aýratyn ähmiýet berip, deňhukukly we özara peýdaly hyzmatdaşlygy giňeldýär, çuňlaşdyrýar. Milli we umumadamzat bähbitlerini gyşarnyksyz goraýar. Halkara guramalar bilen baglaşylan umumadamzat ähmiýetli ylalalyşyklara wepaly bolmak bilen, öz üstüne alan borçnamalaryny üýtgewsiz ýerine ýetirýär.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.
Ýazgy "Altyn asyr: Türkmenistan" teleýaýlymynda 27.12.2022 ýaýlyma berildi.