“Halkara Arbitraž jedelleriniň öňüni almak tejribesi” atly umumy okuw sapagy geçirildi
2022-nji ýylyň 28-nji dekabrynda Türkmenistanyň Daşary işler ministrliginiň Halkara gatnaşyklary institutynda Halkara hukugy we deňeşdirme hukuk öwreniş kafedrasynyň guramagynda “Halkara Arbitraž jedelleriniň öňüni almak tejribesi” atly umumy okuw sapagy geçirildi. 2022–2023-nji okuw ýylynyň Halkara hususy hukugy we Halkara jemagat hukugy ugurlary boýunça magistrantlarynyň gatnaşmagynda geçirilen bu okuw sapagyny ýurdumyzdaky “Hukukçy” hojalyk jemgyýetiniň dolandyryjysy, hukuk ylymlarynyň kandidaty Jumamyrat Gurbanow alyp bardy.
Tejribeli hukukçy sapagyň barşynda Halkara Arbitraž jedelleriniň öňüni almakda toplanan tejribeleriň ähmiýeti, halkara arbitražynyň institusional, ad hoc, halkara täjirçilik we maýa goýum arbitražlary ýaly görnüşleriniň aýratynlyklary, ikitaraplaýyn maýa goýum ylalaşyklarynyň taslamalaryny taýýarlamagyň we olary baglaşmak boýunça gepleşikleri geçirmegiň tejribesiniň nazary hukuk esaslary babatda giňişleýin gürrüň berdi.
Magistrantlaryň hukuk bilimlerini kämilleşdirmekde netijeli geçen okuw sapagynyň dowamynda sorag-jogaplar alşyldy.
Jahan ÖRÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň V ýyl talyby.