GERMANIÝALY WEKILLER BILEN DUŞUŞYK
2026-njy ýylyň 28-nji martynda Türkmenistanyň Daşary işler ministrliginiň Halkara gatnaşyklary institutynda Germaniýanyň abraýly ylmy we innowasion edaralarynyň wekilleri bilen resmi duşuşyk geçirildi. Germaniýa tarapyndan bu duşuşyga Merkezi Aziýanyň durnukly innowasiýalar býurosynyň başlygy, professor Piter Libelt, Germaniýadaky «Ýaşyl Türkmenistan üçin ÝB» taslamasynyň utgaşdyryjysy, professor Moris Koza, Halle-Wittenbergdäki Martin Lýuter uniwersitetiniň wekili, professor Muhammed Usman hem-de şol uniwersitetiň ylmy işgäri Matias Fökel gatnaşdylar. Duşuşyga institutyň okuw işleri boýunça prorektory G.Döwletow, Halkara gatnaşyklary fakultetiniň dekany M.Berdinyýazow, Dünýä dilleri kafedrasynyň müdiri M.Atajanowa we kafedranyň nemes dili mugallymy M.Gerwin gatnaşyp, geljekde meýilleşdirilýän hyzmatdaşlyk meselelerini ara alyp maslahatlaşdylar. Söhbetdeşligiň dowamynda germaniýaly wekiliýetiň agzalary institutyň hünärmenleri bilen geljekde ylym-bilim ugurlary boýunça hyzmatdaşlyk gatnaşyklaryny ýola goýmaga we bilelikdäki taslamalary durmuşa geçirmäge gyzyklanma bildirýändikleri barada gürrüň berdiler. Gepleşikleriň dowamynda durnukly ösüş, innowasion tehnologiýalar we ýokary okuw mekdepleriniň arasyndaky ylmy gatnaşyklary täze derejä çykarmak meselelerine aýratyn üns berildi. Taraplar meýilleşdirilen işleriň geljekde iki ýurduň bähbidine netijeli durmuşa geçiriljekdigine ynam bildirdiler.
Soňra myhmanlar institutda hereket edýän «Parahatçylyk medeniýeti» ÝUNESKO klubynyň işleri bilen tanyşdylar. Şeýle hem, institutyň talyplary bilen duşuşyp, söhbetdeşlik geçirdiler. Duşuşygyň dowamynda talyplar özlerini gyzyklandyrýan meseleler boýunça sorag-jogap alyşdylar.
Bu duşuşyk Türkmenistan bilen Germaniýanyň arasyndaky dostlukly gatnaşyklary, ylym-bilim we ekologiýa diplomatiýasy ulgamlaryny has-da pugtalandyrmakda ähmiýetli ädimleriň biri bolar.
Dünýägözel BABAHANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri
kafedrasynyň mugallymy.