Gender deňligi boýunça tegelek-stol maslahaty
2021-nji ýylyň 23-nji aprelde Türkmenistanyň Daşary işler ministrliginiň Halkara gatnaşyklary institutynda 20-nji aprelde Türkmenistanyň Gender deňligi meseleleri we aýallaryň hukuklaryny we mümkinçiliklerini giňeltmek boýunça BMG-niň edarasynyň (BMG-Zenanlar) Ýerine ýetiriji geňeşiniň 2022-2024-nji ýyllar döwri üçin agzalygyna saýlanmagy mynasybetli tegelek-stol maslahaty geçirildi. Onda Kärdeşler arkalaşyklarynyň Milli merkeziniň we Zenanlar birleşiginiň Merkezi geňeşiniň başlygy Gurbangül Ataýewa, Türkmenistanyň Milli Geňeşiniň Halk Maslahatynyň Ylym-bilim, sanly ulgam, sport we medeniýet baradaky komitetiň başlygy Bahar Seýidowa, Türkmenistanyň Mejlisiniň deputaty, Kada-kanunçylyk baradaky komitetiniň agzasy Jennet Öwekowa, “Neýtralnyý Türkmenistan” gazetiniň baş redaktory Maýa Alimowa, Türkmenistanyň Döwlet, hukuk we demokratiýa institutynyň esasy ylmy işgäri Sülgün Muhammedowa, Halkara gatnaşyklary institutyň mugallymy Gülälek Çopanowa dagylar çykyş etdiler.
Olar öz çykyşlarynda Türkmenistan bilen BMG-niň işjeň hyzmatdaşlygynyň barha ýokarlanýandygy barada bellediler. “BMG-Zenanlar” BMG-niň Baş Assambleýasynyň ýardam beriji edarasy bolup, ol guramanyň ulgamynyň gender deňligi we aýallaryň hukuklaryny we mümkinçiliklerini giňeltmek meseleleri bilen meşgullanýan edaralarynyň işiniň netijeliligini ýokarlandyrmak maksady bilen 2010-njy ýylda döredildi. Bu düzüm gender deňligini üpjün etmegiň meseleleri boýunça BMG-niň ulgamynyň işini utgaşdyryjy esasy edara hökmünde çykyş edýändigini aýtdylar. Şeýle-de maslahatyň dowamynda “BMG-Zenanlaryň” Ýerine ýetiriji geňeşi esasy ýolbaşçylyk wezipeleri alyp barýandygy, düzümiň 51 agzadan ybarat bolup, olar BMG-niň Ykdysady we Durmuş Geňeşi tarapyndan 3 ýyl möhlet bilen saýlanylýandygy dogrusynda durlup geçildi.
Maslahatyň ahyrynda oňa gatnaşyjylar ýurdumyzyň abraýly halkara guramalaryň düzümine saýlanmagy ugrunda uly işleri alyp barýan hormatly Prezidentimize alkyş sözlerini aýtdylar.
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.