Gender deňligi barada onlaýn sapagy
2021-nji ýylyň 5-nji martynda Türkmenistanyň Daşary işler ministrliginiň Halkara gatnaşyklary institutynyň hem-de Halkara Ynsanperwer ylymlary we ösüş uniwersitetiniň arasynda gender deňligi boýunça ikitaraplaýyn tejribeleri paýlaşmaga gönükdirilen onlaýn okuw sapagy geçirildi. Oňa iki ýokary okuw mekdebiniň professor mugallymlary we talyplary gatnaşdylar. Bu onlaýn okuw sapagy türkmen hem iňlis dillerinde alnyp baryldy.
Sapagyň dowamynda çykyş edenler gender deňliginiň Türkmenistanda ileri tutulýan ugurlaryň biri bolup durýandygyny, gender syýasatynyň işjeň alnyp barylýandygyny nygtadylar. Sapakda şeýle-de ýurdumyzda aýallaryň zähmet hukuklary, zenanlaryň jemgyýetçilik-syýasy, durmuş-ykdysady, medeni-ynsanperwer ulgamlarynda alnyp barylýan işlere deň hukukly gatnaşmagynda uly ýardam berýän işjeň gender syýasaty barada we Türkmenistanyň gender deňligi hakyndaky goşulşan halkara konwensiýalary, meýilnamalary dogrusynda hem-de milli kanunçylykda hereket edýän kanunlar babatynda çykyşlar edildi.
Täsirli geçen okuw sapagynyň ahyrynda çykyş edenler ýurdumyzda gender syýasatynyň dabaralanmagy üçin taýsyz tagallalary edýän, eziz Watanymyzyň dünýä ýüzündäki at-abraýyny belende galdyrýan Gahryman Arkadagymyza alkyş sözlerini aýtdylar.
Şahnoza EMINOWA,
Türkmenistanyň Daşary işler ministrliginiň
Halkara gatnşyklary institutynyň
Halkara hukugy fakultetiniň 3-nji ýyl talyby