Garaşsyzlygymyzyň 32 ýyllygy mynasybetli halkara maslahat geçirildi
2023-nji ýylyň 22-nji sentýabrynda Türkmenistanyň Daşary işler
ministrliginiň Halkara gatnaşyklary institutynda mukaddes Garaşsyzlygymyzyň 32
ýyllygy mynasybetli «Türkmenistanyň Garaşsyzlygy: halkara hyzmatdaşlygyny
ösdürmegiň tejribesi we geljegi» atly halkara maslahat geçirildi. Maslahata
Türkmenistanyň Mejlisiniň başlygy, Türkmenistanyň Ministrler Kabinetiniň
Başlygynyň degişli orunbasarlary, Türkmenistanyň ministrlikleriniň, pudak
edaralarynyň, jemgyýetçilik guramalarynyň ýolbaşçylary we işgärleri,
Türkmenistanyň diplomatik düzüminiň, ýurdumyzda hereket edýän daşary ýurtly
diplomatik wekilhanalaryň, köpçülikleýin habar beriş serişdeleriniň wekilleri,
ýokary okuw mekdepleriniň rektorlary, professor-mugallymlary we talyplary,
syýasatşynaslar gatnaşdylar.
Geçirilen halkara maslahatynyň öňüsyrasynda oňa gatnaşyjylar institutyň
baş binasynda ýaýbaňlandyrylan sergini synladylar. Sergide Arkadagly
Serdarymyzyň baştutanlygynda ýurdumyzyň ykdysadyýetiniň dürli ulgamlarynyň,
pudaklarynyň gazanan üstünlikleri şöhlelendirildi.
Halkara maslahatda çykyş edenler hormatly Prezidentimiziň öňdengörüjilikli
baştutanlygynda Türkmenistan döwletimiziň ösüşiň we abadançylygyň ak ýoly
bilen ynamly öňe barýandygyny nygtap geçdiler. Soňky ýyllarda ýurdumyzda
gazanylýan ägirt uly üstünlikler, durmuş-ykdysady, medeni-ynsanperwer
ulgamlarda durmuşa geçirilýän giň möçberli işler Watanymyzyň dünýädäki belent
abraýyny şertlendirdi.
Maslahatda çykyş edenleriň belleýşi ýaly, berkarar döwletiň täze eýýamynyň
Galkynyşy döwründe ýurdumyzyň Bitaraplyk derejesine esaslanýan daşary
syýasatynda hoşniýetli goňşuçylyga, birek-birege sarpa goýmaga, dünýä
döwletleri, iri halkara guramalary bilen özara bähbitli hyzmatdaşlyga aýratyn üns
berilýär. Çykyşlarda bellenilişi ýaly, türkmen halkynyň Milli Lideri Gahryman
Arkadagymyzyň halkara giňişliginde öňe süren «Dialog — parahatçylygyň kepili»
atly filosofiýasy dünýä döwletleriniň arasynda köptaraplaýyn hyzmatdaşlygy
işjeňleşdirmekde binýatlyk esas bolup durýar. Halkara maslahatynyň ahyrynda oňa
gatnaşyjylar hormatly Prezidentimiziň adyna Ýüzlenme kabul etdiler.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
3-nji ýyl talyby.
Şeýle hem bu barada şu ýerden
okap bilersiňiz: