GAHRYMANLARYŇ EDERMENLIGI – WATANSÖÝÜJILIGIŇ BEÝIK MEKDEBI
Maý aýynyň gelmegi bilen ýurdumyzyň ähli künjeklerinde Beýik Ýeňşiň, 1941–1945-nji ýyllaryň Beýik Watançylyk urşunda edermenlik görkezen we mähriban ojaklaryna sag-aman dolanyp gelen, şeýle hem tylda zähmet çeken adamlaryň hormatyna guralýan dabaralar giňden ýaýbaňlandyrylýar. 2022-nji ýylyň 7-nji maýynda Türkmenistanyň Daşary işler ministrliginiň Halkara gatnaşyklary institutynyň professor-mugallymlary we talyp ýaşlary bilen bilelikde «Halk hakydasy» ýadygärlikler toplumynda gezelenç gurnaldy.
Gezelenjiň dowamynda institutyň Jemgyýeti öwreniş ylymlary kafedrasynyň uly mugallymy Täçnabat Paýtykowa talyp ýaşlar bilen «Baky şöhrat» we «Milletiň ogullary» ýaly 1941-1945-nji ýyllaryň urşunda söweş meýdanlarynda baş goýan Watan goragçylarynyň ýadygärlikleri, şeýle hem «Ruhy tagzym» ýadygärliklerine aýlanyp, gazaply uruş ýyllarynda türkmen halkynyň müňlerçe edermen ogullarynyň doganlyk halklaryň wekilleri bilen egin-egne berip, söweş meýdanlarynda gaýduwsyzlyk görkezendikleri hem-de hakyky edermenligiň, durnuklylygyň, şöhratyň we namysyň beýik nusgasyna öwrülendikleri barada täsirli gürrüňleri berdi. Beýik Ýeňiş güni mynasybetli guralan bu gezelenç geljek ýaş nesilleriň hakydasynda watançylygyň we merdanalygyň synmaz nyşany bolup hemişelik galjaklygynyň aýdyň şaýady boldy.
Halkymyzyň azat durmuş, erkin ýaşaýyş ugrunda gören görgüleridir çeken pidalary, görkezen edermenligi we gahrymançylygy hiç haçan ýatdan çykmaz. Biz merdana watandaşlarymyzyň söweşlerde görkezen edermenlikleri, tylda çeken tutanýerli zähmetleri bilen bütin adamzadyň öňünde bitiren beýik işlerine tüýs ýürekden guwanýarys!
Merjen JUMAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.