Fransuz diliniň halkara güni mynasybetli döredijilik duşuşygy
2022-nji ýylyň 18-nji martynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň «Lingvo World» gurnagynyň guramagynda institutyň talyplarynyň gatnaşmagynda Türkmenistan bilen Fransiýa Respublikasynyň arasynda diplomatik gatnaşyklaryň ýola goýulmagynyň 30 ýyllygy, Birleşen Milletler Guramasynyň senenamasyndaky fransuz diliniň halkara güni, şeýle hem Halkara Nowruz güni mynasybetli BMG-niň Baş Assambleýasynyň kabul eden Kararnamalarynyň ähmiýeti dogrusynda gurnagyň agzalarynyň arasynda döredijilik duşuşygy geçirildi.
Duşuşygyň dowamynda institutymyzyň talyplary fransuz dilinde taýýarlan prezentasiýalary, tanymal fransuz şahyrlarynyň bahar pasly baradaky goşgulary, Halkara Nowruz baýramynyň taryhy, däp-dessurlary barada prezentasiýalary bilen çykyş etdiler. Duşuşyk Halkara hukugy fakultetiniň talyby Atajan Rozybaýewiň fransuz dilinde ýerine ýetiren aýdymy bilen öz täsirliligini artdyrdy.
Döredijilik duşuşygynyň fransuz dilinde geçirilmegi, talyplaryň daşary ýurt dillerini söýüp öwrenmäge, ukyp-başarnyklaryny ýüze çykarmaga, ösdürmäge, özbaşdak pikirlenmek, işlemek endiklerini artdyrmaga ýardam etdi.
Duşuşygyň ahyrynda ýurdumyzda talyp ýaşlara daşary ýurt dillerini öwrenmäge döredilýän şertler üçin hormatly Prezidentimize hoşallyk sözleri aýdyldy.
Zulfiýa ÝAŇABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.