Fransuz dilini okatmakda ulanylýan döredijilikli usullara bagyşlanan onlaýn okuw sapagy
2022-nji ýylyň 24-nji martynda Fransiýa Respublikasynyň Türkmenistandaky ilçihanasynyň, şeýle-de onuň ýanyndaky Fransuz dili okuw merkezi we Fransiýanyň Grenobl şäheriniň Uniwersitet neşirýaty bilen bilelikde guramagynda Aşgabat şäherindäki ýokary okuw mekdepleriniň fransuz dili mugallymlary üçin onlaýn okuw sapagy geçirildi. Onlaýn okuw sapagyna Fransiýa Respublikasynyň Türkmenistandaky Adatdan daşary we Doly ygtyýarly Ilçisi hanym Izabel Ginel, Fransuz dili okuw merkeziniň direktory jenap Roman Guwerne, şol merkeziň medeniýet işleri boýunça kömekçisi Alfiýa Sidorowa, şeýle-de Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň, Türkmenistanyň Daşary işler ministrliginiň Halkara gatnaşyklary institutynyň fransuz dili mugallymlary gatnaşdylar.
Türkmenistan bilen Fransiýa Respublikasynyň arasynda diplomatik gatnaşyklaryň ýola goýulmagynyň 30 ýyllygy mynasybetli we Frankofoniýa hepdeliginiň çäklerinde geçirilýän onlaýn okuw sapagyny Fransiýanyň Türkmenistandaky Ilçisi hanym Izabel Ginel açyp, Türkmenistan bilen Fransiýanyň arasyndaky ikitaraplaýyn gatnaşyklara, Merkezi Aziýada, şol sanda Türkmenistanda fransuz diliniň okadylyşyna oňat baha berdi we okuw sapagynyň üstünlikli geçmegini arzuw etdi.
Onlaýn okuw sapagyny jenap Roman Guwerne alyp baryp, ilkinji sözi Grenobl şäheriniň Uniwersitet neşirýatynyň täjirçilik direktory, müdiriýetiň başlygy hanym Silwi Bigo berdi. Soňra şol neşirýatyň fransuz dilini daşary ýurt dili hökmünde okatmak boýunça bölüminiň alym direktory hanym Izabel Gruka çykyş etdi.
Çykyş edenler hanym Izabel Grukanyň ýolbaşçylygyndaky 10 sany awtoryň fransuz dilini başlangyç derejede (A1, A2) öwrenýänler üçin kitap we elektron görnüşde taýýarlan, fransuz diliniň grammatikasyny, sözlük düzümini, diliň medeniýetini we siwilizasiýasyny öwrenmäge, diňlemek we sözleýiş endiklerini artdyrmaga niýetlenen okuw kitaplaryny giňişleýin tanyşdyrdylar we olarda ulanylan dürli döredijilikli usullary görkezdiler.
Onlaýn okuw sapagynyň ahyrynda Türkmenistanyň ýokary okuw mekdepleriniň fransuz dili mugallymlary çykyş edenler bilen sorag-jogap alyşdylar, kitaplaryň tanyşdyrylyşy, şeýle hem Grenoblyň Uniwersitet neşirýaty tarapyndan 3 sany türkmen ýokary okuw mekdebine sowgat berilýän bu okuw kitaplarynyň toplumy üçin tüýs ýürekden hoşallyk sözlerini aýtdylar.
Ogulbeg GAZAKOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň fransuz dili mugallymy.