Energetika diplomatiýasy: Antalýa diplomatiýa forumyna bagyşlanan okuw sapagy
Her hepdäniň sişenbe güni türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynda energetika diplomatiýasy ugry boýunça okuw sapaklary geçirilýär. 2024-nji ýylyň 6-njy martynda institutymyzyň Halkara gatnaşyklary we diplomatiýa kafedrasynyň uly mugallymy, Adatdan daşary we Doly ygtyýarly ilçisi Nurberdi Amanmyradow talyplar bilen okuw sapagyny geçirdi.
Bu okuw sapagy türkmen halkynyň Milli Lideri, Türkmenistanyň Halk Maslahatynyň Başlygynyň Türkiýe Respublikasynda geçirilen üçünji Antalýa diplomatiýa forumynda energetika we “ýaşyl” diplomatiýa boýunça eden çykyşynyň ähmiýeti barada bolup, onda mugallym Türkmenistanyň daşary syýasaty pes uglerodly energetika geçmek arkaly energiýa birikmesini amala aşyrmak ýaly strategik ugra eýerýändigini we bu ugurda “ýaşyl” diplomatiýa hem-de dünýäde hyzmatdaşlyk etmegiň şeýle nusgasyny ileri tutmaga aýratyn orun berýändigini belledi. Munuň özi bilelikdäki jogapkärçilige, köpçülikleýin we toparlaýyn bähbitleri ýeňip geçmäge, geljege hyzmat etmäge ýardam edýär.
Şeýle-de okuw sapagynyň dowamynda uly mugallym Türkmenistanyň energetika diplomatiýasynyň milli sebit we dünýä üçin wajyp ähmiýeti, Türkmenistanyň energetika çygrynda ikitaraplaýyn we köptaraplaýyn hyzmatdaşlygy, BMG-niň durnukly energetika ösüşi we howanyň üýtgemegi boýunça global başlangyçlary barada giňişleýin gürrüň berdi.
Talyplar üçin bu okuw sapagy örän täsirli bolup, olar özlerini gyzyklandyrýan sowallara giňişleýin jogap aldylar.
Zybagözel HALDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.