30/11/-0001
680
El hünäri- Il gezer
2022-nji ýylyň 19-njy ýanwarynda Türkmenistanyň Daşary işler ministrliginiň Halkara gatnaşyklary institutynda ýurdumyzyň ýokary okuw mekdepleriniň talyp gyzlarynyň arasynda yglan edilen “El hünäri - il gezer” atly bäsleşigiň institut tapgyry geçirildi. Oňa instititymyzyň talyp gyzlary, köpçülikleýin habar beriş serişdeleriniň wekilleri gatnaşdylar.
Bäsleşikde talyp gyzlar jorap, alaja örmek, keşde çekmek hem-de milli mirasymyzy çeper aýdyşyklar arkaly taryp etmek ýaly ugurlar boýunça bäsleşdiler. Ýaryşyň dowamynda talyp gyzlaryň ýerine ýetirmeginde “Halkyň Arkadagly zamanasy” ýylyny, Gahryman Arkadagymyzyň baştutanlygynda alnyp barylýan beýik işleri, ýetilen belent sepgitleri, halkymyzyň baý geçmiş mirasyny, medeni gymmatlyklarymyzy wasp edýän goşgularyň, şeýle hem Prezidentimiziň “Ýaşasyn parahat durmuş” atly goşgusynyň okalmagy, çeper sözleriň aýdylmagy bäsleşige aýratyn millilik öwüşginlerini berdi.
Ata-babalarymyzdan we ene-mamalarymyzdan nesilden-nesle geçip, dowam edip gelýän milli el işleriniň görnişlerini, milli baýramçylyklarymyzy, taryhy we medeni ýadygärliklerimizi özünde jemleýän “El bukja” atly sahna oýnunyň görkezilmegi bäsleşigiň many-mazmunyny has-da artdyrdy.
Emin agzalaryň gelen netijesine görä, Halkara gatnaşyklary fakultetiniň 1-nji ýyl talyby Aýşat Aşyrowa, Halkara hukugy fakultetiniň 1-nji ýyl talyby Oguljahan Jobborowa, Halkara ykdysady gatnaşyklary fakultetiniň 2-nji ýyl talyby Enegül Annamyradowa, Halkara žurnalistikasy fakultetiniň 1-nji ýyl talyby Uzukjemal Annamyradowa we 2-nji ýyl talyby Bägül Merdanowa ýeňijiler hökmünde yglan edildi.
Uzukjemal ANNAMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.