Ekologiýa diplomatiýasyna bagyşlanan maslahat
2022-nji 4-nji iýunynda Türkmenistanyň Daşary işler ministrliginiň Halkara gatnaşyklary institutynda «Ekologiýa diplomatiýasy we ekologiýanyň täze ölçeglerine laýyklykda hyzmatdaşlygy ösdürmegiň ugurlary» atly maslahat geçirildi. Daşky gurşawy goramagyň bütindünýä gününiň öňýanynda geçirilen bu maslahata Türkmenistanyň Milli Geňeşiniň Halk Maslahatynyň, Türkmenistanyň Milli Geňeşiniň Mejlisiniň, jemgyýetçilik guramalarynyň wekilleri, şeýle-de institutyň professor mugallymlarydyr talyp ýaşlary gatnaşdylar.
Maslahaty Türkmenistanyň Daşary işler ministrliginiň Halkara gatnaşyklary institutynyň mugallymy Perhat Çaryýew alyp bardy. Şeýle-de maslahatyň dowamynda Türkmenistanyň Milli Geňeşiniň Halk Maslahatynyň Sebitleýin ösüş, daşky gurşawy goramak we agrosenagat syýasaty baradaky komitetiniň agzasy Halymberdi Hajyýew, Türkmenistanyň Milli Geňeşiniň Mejlisiniň Daşky gurşawy goramak, tebigatdan peýdalanmak we agrosenagat toplumy baradaky komitetiniň agzasy Gurbangeldi Aşyrow, Türkmenistanyň Daşary işler ministrliginiň Halkara gatnaşyklary institutynyň uly mugallymy Ogulgurban Ezimowa, Türkmenistanyň Demokratik partiýasynyň Ahal welaýat komitetiniň bölüm müdiri Araphan Erniýazow, Türkmenistanyň Kärdeşler arkalaşyklarynyň Milli Merkeziniň Agrosenagat işgärleriniň Kärdeşler arkalaşygy boýunça utgaşdyryjysy Berdimyrat Rozyýew, Türkmenistanyň Magtymguly adyndaky Ýaşlar guramasynyň Merkezi Geňeşiniň baş hünärmeni Gurbanmyrat Muhammedow hem-de Türkmenistanyň Daşary işler ministrliginiň Halkara gatnaşyklary institutynyň talyby Mätgurban Mätgurbanow dagy çykyş etdiler. Çykyş edenler Gahryman Arkadagymyz tarapyndan başy başlanan, Arkadagly Serdarymyz tarapyndan mynasyp dowam etdirilýän ýurdumyzyň alyp barýan ekologiýa diplomatiýasynyň dünýä derejesinde dabaralanýandygy, Türkmenistan tarapyndan öňe sürülýän sebit we dünýä ähmiýetli ekologik başlangyçlaryň halkara giňişlikde goldaw tapýandygy, eziz Diýarymyzda daşky gurşawy we tebigatdaky biodürlüligiň gorap saklanylmagy bilen bagly işleriň barha giň gerime eýe bolýandygy barada giňişleýin gürrüň etdiler. Mundan başga-da, çykyşlarda hormatly Prezidentimiz tarapyndan daşary ýurtlar we halkara guramalar bilen ekologiýa babatda hyzmatdaşlygy ösdürmäge uly ünsüň berilýändigi, munuň bolsa öz gezeginde sebitiň ekologiýa abadançylygyna oňyn täsir etjekdigi barada hem aýratyn nygtaldy. Söz sözlänler ýurdumyzy bagy-bossanlyga öwürmek, raýatlaryň bagtyýar durmuşyny üpjün etmek üçin amatly howa gurşawyny döretmek, köpöwüşginli we baý türkmen tebigatyny gorap saklamak babatda taýsyz tagallalary alyp barýan hormatly Prezidentimize çäksiz sagbolsunlaryny aýtdylar.
Gurbanmyrat AŞYROW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.