"Durnukly ösüş üçin suw" atly halkara hereketleriň onýyllygyna bagyşlanan okuw maslahaty
2023-nji ýylyň 29-njy martynda Türkmenistanyň Daşary işler ministrliginiň Halkara gatnaşyklary institutynda "Durnukly ösüş üçin suw" atly halkara hereketleriň onýyllygyna bagyşlanan okuw maslahaty geçirildi. Oňa halkara guramalarynyň we ýurdumyzdaky ýokary okuw mekdepleriniň wekilleri, Aşgabat şäherindäki 68-nji orta mekdebiň okuwçylary hem-de Türkmenistanyň Daşary işler ministrliginiň Halkara gatnaşyklary institutynyň professor mugallymlary we talyplary gatnaşdylar.
Okuw maslahatynda BMG-niň Türkmenistandaky hemişelik utgaşdyryjy edarasynyň wekili Wladimir Waletko, S.A. Nyýazow adyndaky Türkmen oba hojalyk uniwersitetiniň Gidrotehniki desgalar kafedrasynyň müdiri, professor Italmaz Saparlyýew çykyş edip, 2016-njy ýylyň 21-nji dekabrynda BMG-niň Baş Assambleýasy tarapyndan “Durnukly ösüş üçin Suw” atly rezolýusiýasy bilen tassyklanan 2018-2028-nji ýyllar üçin on ýyllyk hereketleriň meýilnamasynyň öňde goýan maksatlary we wezipeleri barada gürrüň berdiler.
Okuw maslahatynyň dowamynda BMG-niň agza döwletleri, halkara guramalary we maliýe guramalary tarapyndan Suw baýlyklary boýunça degişli Durnukly ösüş maksatlaryny durmuşa geçirmekde ýerine ýetirilen işleriň we Türkmenistanda suw babatda halkara hyzmatdaşlygyny ösdürmegiň möhüm ugurlarynyň üstünde durlup geçildi.
Maslahatyň ahyrynda oňa gatnaşyjylar bilermenlere özlerini gyzyklandyrýan soraglary berdiler hem-de agzalýan meseleler boýunça özara pikir alyşdylar.
Aýna BABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.