Dost-doganlyk mukamy ýaňlandy
2023-nji ýylyň 31-nji oktýabrynda Magtymguly adyndaky milli sazly drama teatrynda Merkezi Aziýa döwletleriniň we Koreýa Respublikasynyň medeniýetine hem-de aýdym-saz sungatyna bagyşlanyp medeniýet we sungat ussatlarynyň konserti geçirildi.
Merkezi Aziýa döwletleriniň we Koreýa Respublikasynyň medeniýetine we aýdym-saz sungatyna bagyşlanan konsert Türkmenistanyň halk artisti Sahydursun Hojakowanyň hem-de Türkmenistanyň Döwlet horunyň ýerine ýetirmeginde «Meniň Watanym» diýen aýdymy bilen badalga aldy. Häzirki zaman tehnologiýalarynyň netijeli ulanylmagy baýramçylyk aýdym-sazlaryna özboluşly öwüşgin çaýdy we sahnada janly çykyşlaryň emele gelmegini şertlendirdi. Konsert Türkmenistanyň medeniýet we sungat ussatlarynyň, folklor tans toparlarynyň taýýarlan türkmen, gazak, gyrgyz, täjik, özbek, koreý aýdymdyr tanslary bilen sazlaşykly utgaşdy. Belentden ýaňlanan aýdym-sazlaryň şirin mukamlary ýygnananlarda göwün göteriji ýagdaýy döretdi.
«Laçyn» folklor toparynyň ýerine ýetirmeginde «Küştdepdi» tansy myhmanlaryň şatlyk-şowhunyny has-da goşalandyrdy. Dabaraly konsert Türkmenistanyň halk artisti Akmuhammet Hanowyň hem-de Türkmenistanyň at gazanan artisti Çynar Jumaýewanyň ýerine ýetirmeginde «Dost-doganlyk aýdymy» bilen jemlendi. Munuň özi ýurtlarymyzyň arasyndaky dost-doganlyk, medeni-ynsanperwer gatnaşyklaryň has-da berkeýändigine güwä geçýär.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.