DIPLOMATIK DÜZÜMIŇ DUAÝÝENI TÜRKMEN DIPLOMATIÝASYNYŇ MILLI MEKDEBINDE
2022-nji ýylyň 25-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistan bilen Russiýa Federasiýasynyň arasyndaky diplomatik gatnaşyklaryň ýola goýulmagynyň 30 ýyllygy mynasybetli Russiýa Federasiýasynyň Türkmenistandaky Adatdan daşary we Doly ygtyýarly ilçisi Aleksandr Blohin bilen institutyň talyp ýaşlarynyň arasynda duşuşyk geçirildi. Bu duşuşyk institutyň Strategiki barlaglar boýunça ylmy merkeziniň uly ylmy işgäri, filologiýa ylymlarynyň kandidaty, halypa žurnalist Bekdurdy Amansaryýewiň alyp barmagynda gurnaldy.
Duşuşygyň dowamynda ilçi diplomatik gatnaşyklaryň ýola goýulmagynyň ilkinji günlerinden başlap dostlukly döwletleriň arasyndaky ähli ugurlar boýunça hyzmatdaşlygyň ösdürilmegine aýratyn ähmiýet berilýändigini nygtady. Türkmenistanyň halkara meselelerine bolan çemeleşmeleriniň Russiýanyň garaýyşlary bilen gabat gelýändigini aýdyp, ýurtlaryň dünýä talaplaryna laýyklykda ähli ugurlarda hyzmatdaşlygy ösdürmekde maksatnamalaýyn işleriň durmuşa geçirilýändigi barada aýratyn belläp, türkmen-rus gatnaşyklarynyň 30 ýyllyk tejribesine üns çekmek bilen, bu döwürde baglaşylan ylalaşyklar we şertnamalar, olaryň ähmiýeti, şeýle-de halkara guramalarynyň işiniň çygryndaky özara bähbitli çözgütler dogrusynda durup geçdi.
Duşuşygyň barşynda talyp ýaşlar hormatly myhmana türkmen-rus gatnaşyklarynyň geljegi, saýlan hünär ugurlary bilen bagly özlerini gyzyklandyrýan sowallary berdiler. Adatdan daşary we Doly ygtyýarly ilçi derejesinde 25 ýyldan gowrak iş tejribesi bolan diplomat özüne berlen sowallara giňişleýin jogap bermek bilen çäklenmän, eýsem ýaş halkaraçylaryň geljekki iş tejribesinde degerli boljak maslahatlary hem berdi.
Şeker HUDAÝBERENOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.