Dil dünýäniň açary
29-njy martda Döwletmämmet Azady adyndaky Türkmen milli dünýä diller institutynda Türkmenistanda dilleri okatmak boýunça utgaşdyryjy Geňeşiň nobatdaky maslahaty geçirildi. Bu maslahata Türkmenistanyň Bilim ministrliginiň, milli Bilim institutynyň, Türkmenistanyň Ylymlar Akademiýasynyň hem-de ýurdumyzyň ýokary okuw mekdepleriniň, welaýatlaryň we Aşgabat şäheriniň baş bilim müdirlikleriniň daşary ýurt dilleri boýunça mugallymlary we hünärmenleri gatnaşdy. Bu maslahatda Türkmenistanyň Daşary işler ministrliginiň Halkara gatnaşyklary institutyndan Batyr Kairow hem-de Osman Hemzäýew wekillik etdi. Onda golaýda kabul edilen “Türkmenistany 2022-2052-nji ýyllarda durmuş-ykdysady taýdan ösdürmegiň Milli maksatnamasyna” laýyklykda, “Türkmenistanda daşary ýurt dillerini okatmagy kämilleşdirmegiň konsepsiýasyny” ýerine ýetirmeklige täze goşmaçalar, üýtgetmeler girizmek meselesine, utgaşdyryjy Geňeşiň täze düzüminiň, täze maksatnamasynyň tassyklanmagyna hem-de mundan beýlä konsepsiýanyň jemleýji bölegini ýerine ýetirmek üçin meýilnama seredildi. Maslahatyň dowamynda ýurdumyzda daşary ýurt dillerini öwretmek boýunça öňde durýan wajyp wezipeleri amala aşyrmakda bu ugurda toplanan milli hem-de dünýä tejribelerine daýanmaklygyň möhümdigi bellenilip geçildi. Ýaş nesilleriň dünýä dillerini öwrenmegi üçin döwletimiz tarapyndan döredilýän giň mümkinçiliklerden peýdalanyp, ýurdumyzda dünýä dilleriniň ýaýrawyny has-da giňeldip boljakdagy hakynda hem nygtaldy.
Batyr Kairow,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň
mugallymy