«DIALOG – PARAHATÇYLYGYŇ KEPILI» ATLY MASLAHAT GEÇIRILDI
2023-nji ýylyň 27-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Halk Maslahaty, Mejlisi, Bilim ministrligi we Birleşen Milletler Guramasynyň Bilim, ylym we medeniýet boýunça guramasynyň (ÝUNESKO) işleri barada Türkmenistanyň milli toparynyň sekretariaty tarapyndan gurnalan «Dialog – parahatçylygyň kepili» atly ýaşlar bilen maslahat geçirildi. Maslahata Türkmenistanyň Gahrymany; Birleşen Milletler Guramasynyň Bilim, ylym we medeniýet boýunça guramasynyň (ÝUNESKO) işleri barada Türkmenistanyň milli toparynyň jogapkär sekretary Çynar Rüstemowa, Türkmenistanyň Mejlisiniň deputaty; Halkara we parlamentara aragatnaşyklar baradaky komitetiniň agzasy Kerimguly Geldiýew, şeýle hem institutymyzyň professor-mugallymlary we talyplary gatnaşdylar.
Maslahatyň dowamynda oňa gatnaşyjylar Türkmenistan döwletimiziň daşary syýasatynda gazanan üstünlikleri, döwletimiz tarapyndan öňe sürülen «Dialog – parahatçylygyň kepili» atly filosofiýanyň dünýä jemgyýetçiligine teklip edilmegi, şeýle-de döwletimiziň halkara gatnaşyklarynda ylym, bilim we medeniýet ugurlardaky hyzmatdaşlyklary barada çykyş etdiler.
Mundan başga-da, maslahata gatnaşyjylar Birleşen Milletler Guramasynyň Baş Assambleýasynyň 77-nji sessiýasynyň çäklerinde kabul edilen “2023-nji ýyl-Parahatçylygyň kepili hökmünde dialogyň halkara ýyly” atly Kararnamasynyň ýurdumyzyň uzak ýyllaryň dowamynda bu ugurda gazanan umumyadamzat bähbitleri göz öňünde tutýan halkara başlangyçlaryna esaslanýanlygyny nygtadylar.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.