“Daşary ýurt dillerini öwretmegiň hemmetaraplaýyn kämilleşdirilişi” atly okuw-usuly maslahat
2022-nji ýylyň 31-nji martynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň guramagynda “Daşary ýurt dillerini öwretmegiň hemmetaraplaýyn kämilleşdirilişi” atly okuw-usuly maslahat geçirildi. Türkmenistanda daşary ýurt dillerini okatmagy kämilleşdirmegiň Konsepsiýasyny durmuşa geçirmek maksady bilen daşary ýurt dilleriniň okadylyş aýratynlyklary barada geçirilen maslahata Aşgabat şäheriniň № 76, 72, 68 mekdepleriniň daşary ýurt dillerini öwredýän mugallymlary hem gatnaşdy. Usuly maslahatda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň iňlis dili mugallymy M.Orazowa, nemes dili mugallymy A.Ýazberdiýewa, rus dili mugallymy T.Babaýewa, Germaniýa Akademiki alyş-çalyş gullugynyň (DAAD) lektory, institutyň Dünýä dilleri kafedrasynyň mugallymy G.Maag, we Döwletmämmet Azady adyndaky Türkmen milli dünýä dilleri institutynyň Iňlis dili kafedrasynyň aspiranty G. Gurbanmämmedowa çykyş etdiler.
Maslahata gatnaşyjylar daşary ýurt dillerini okatmagyň täze usullary we öňdebaryjy tejribeleri barada giňişleýin pikir alyşdylar. Maslahat örän gyzykly we täsirli geçdi. Daşary ýurt dillerini dürli ýaşdakylara öwretmegiň tärleri giňden ara alnyp maslahatlaşyldy. Dil sapaklarynda dürli oýunlaryň, sahnalaryň, ara alyp maslahatlaşmalaryň, çekişmeleriň guralyşy, aýdymlaryň, goşgularyň, wideofilmleriň, kompýuterleriň, internet ulgamynyň, görkezme esbaplaryň we tehniki serişdeleriň ulanylyşy barada mugallymlar tejribe alyşdylar.
Usuly maslahata gatnaşan mugallymlary maslahatda ara alyp maslahatlaşylan usullaryň tejribede sapak wagtynda ulanylyşyny Dünýä dilleri kafedrasynyň mugallymy O.Gazakowanyň “Fransuz dili” boýunça açyk sapagyna gatnaşmak arkaly iş ýüzünde görmek mümkinçiligine hem eýe boldylar.
Selbi NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.