Çagalary goramagyň Halkara gününe bagyşlanan akyl-paýhas bäsleşigi
2026-njy ýylyň 30-njy maýynda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň guramagynda Çagalary goramagyň Halkara güni mynasybetli I ýyl talyplarynyň arasynda «Breýn-ring» bäsleşigi geçirildi.
Aýratyn ähmiýete eýe bolan bu akyl-paýhas bäsleşiginde berlen sowallar esasan Çagalary goramagyň Halkara gününiň taryhyna we ähmiýetine bagyşlandy. Şert boýunça institutyň her fakultetinden saýlanan 6 talypdan ybarat bolan toparlar ilki bilen öz toparlarynyň atlaryny iňlis dilinde tanyşdyrdylar. Soňra bije çekişlik arkaly oýnuň tertibi kesgitlenip, bäsleşige badalga berildi.
Gaty çekeleşikli we gyzykly geçen bäsleşigiň dowamynda talyplar berlen her bir sowala dogry we giňişleýin jogap bermek bilen, özleriniň bilesigelijiligini hem-de gyzyklanmalaryny görkezdiler.
Bäsleşigiň netijeleri boýunça ýeňijiler aşakdaky ýaly kesgitlenildi: I orun: Halkara gatnaşyklary fakultetiniň «Messenger» topary; II orun: Halkara hukugy fakultetiniň «Young Lawyers» topary; III orunlar: Halkara žurnalistikasy fakultetiniň «Future Journalists» hem-de Halkara ykdysady gatnaşyklary fakultetiniň «Voice of Youth» toparlary.
Bu bäsleşik talyp ýaşlaryň Çagalary goramagyň Halkara gününiň dörediliş taryhy hem-de çaga hukuklary baradaky halkara we milli kada-kanunlar baradaky bilimlerini artdyrmaga, olaryň dünýägaraşyny has-da giňeltmäge uly ýardam etdi.
Rejepguly MAŞADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby