Bütindünýä saglyk güni hem-de saglyk biraýlygynyň başlanmagy mynasybetli sport çärelerine badalga berildi
2024-nji ýylyň 1-nji aprelinda Türkmenistanyň Daşary işler ministrliginiň Halkara gatnaşyklary institutynda Bütindünýä saglyk güni hem-de saglyk biraýlygynyň başlanmagy mynasybetli köpçülikleýin bedenterbiýe we sport çärelerine badalga berildi. Bu çäreleriň başlanmagy bilen institutymyzyň talyp ýaşlarynyň arasynda sportuň dürli görnüşleri boýunça, esasanda, welosiped sportuny söýüjileriň gatnaşmaklarynda köpçülikleýin welosipedli ýöriş guraldy. Institutymyzda ýerleşýän ýaş diplomatlaryň küşt merkezinde bolsa, talyp gyzlar we oglanlar öz aralarynda küşt we şaşka boýunça ýaryşdylar. Sport toplumynda talyp oglanlaryň arasynda geçirilen sportuň gandbol hem-de basketbol görnüşi boýunça fakultetara ýaryşlar diýseň çekeleşikli we gyzykly boldy. Şeýle sport çäreleri aprel aýynyň dowamynda yzygiderli dowam eder.
Jemgyýetiň we döwletiň iň ýokary gymmatlygy bolan adamyň saglygyny goramak Türkmenistanda döwlet syýasatynyň ileri tutulýan ugurlarynyň biri bolup durýar. Türkmenistanyň Prezidenti Serdar Berdimuhamedowyň öňe sürýän “Watan diňe halky bilen Watandyr! Döwlet diňe halky bilen döwletdir!” ýörelgesi esasynda milli saglygy goraýyş ulgamyny has-da döwrebaplaşdyrmak üçin täze belent maksatlar we wezipeler goýulýar. Döwlet Baştutanymyzyň nygtaýşy ýaly, saglyk diňe bir adam üçin däl, eýsem, tutuş jemgyýetimiz üçin hem bahasyna ýetip bolmajak gymmatlykdyr. Çünki saglyk güýç-kuwwatyň, zähmet hem-de döredijilik işjeňliginiň, doly bahaly we abadan durmuşyň çeşmesidir. Şonuň üçin hem bu ugur Türkmenistanyň durmuş maksatly döwlet syýasatynyň ileri tutulýan ugurlarynyň biridir.
Oguljahan JOBBOROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.