Birleşen Milletler Guramasyna bagyşlanan okuw sapagy
2022-nji ýylyň 21-nji oktýabrynda Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň döredilen güni mynasybetli Birleşen Milletler Guramasynyň Ykdysady we Durmuş Geňeşi barada okuw sapagy geçirildi. Bu okuw sapagyna Halkara ykdysady gatnaşyklary fakultetiniň talyplary işjeň gatnaşyp, guramanyň alyp barýan işi bilen içgin tanyşdylar.
Birleşen Milletler Guramasynyň Ykdysady we Durmuş Geňeşi Birleşen Milletler Guramasynyň esasy düzümleriniň biri bolup, ykdysady, durmuş ulgamlarynyň, saglygy goraýyş we bilim pudaklarynyň, şeýle hem Birleşen Milletler Guramasynyň we onuň ýöriteleşdirilen guramalarynyň we düzümleriniň işini utgaşdyrýar. Bu guramanyň iş ygtyýarlyklaryna ykdysady we durmuş öňegidişlige ýardam bermek, şol sanda halkyň ýaşaýyş derejesini ýokarlandyrmak we dolulygyna iş bilen meşgullygyny üpjün etmek, ykdysady we durmuş hem-de saglygy goraýyş çygyrlarynda halkara meselelerini çözmegiň usullaryny taýýarlamak degişlidir.
Şunuň ýaly okuw sapaklarynyň geçirilmegi, talyplaryň Türkmenistan döwletimiziň Birleşen Milletler Guramasy ýaly guramalar bilen alyp barýan hyzmatdaşlygyny içgin öwrenmäge ýardam edýär.
Rahmangylyç ANNAGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň III ýyl talyby.