«Behişdi bedewler - milli buýsanjymyz» atly ylmy seminar geçirildi
«Saňa at diýmerin, gardaş diýerin» diýip ýüzlenýän halkymyzyň durmuşyndaky ahalteke bedewleriniň orny uludyr. Ata-babalarymyzyň müňýyllyklara uzaýan gadymy taryhyndan miras galan gamyşgulak bedewlerimiziň häzirki döwrümiziň ösüşleriniň özboluşly nyşanyna öwrülmeginde, olaryň naýbaşy gymmatlyk hökmünde bütin dünýäde ykrar edilmeginde ony aňryýany bilen görmek bolýar.
Türkmeniň atçylyk sungaty toplumlaýyn häsiýeti bilen özboluşly usullary özünde jemleýän seýisçiligi we çapyksuwarlygy beýan edýär. Bu sungatyň bütin dünýäde at-owazasynyň ýaýramagy we biziň günlerimize gelip ýetmegi geçmişde ata-babalarymyzyň ynsan kimin üşükli, eýesine wepaly, ýyndamlykda meşhurlyga eýe bolan ýüwrük atlary ýetişdirmek bilen birlikde, olaryň tohum häsiýetini gowulandyrmaga aýratyn üns berendiginiň netijesidir.
Berkarar döwletiň täze eýýamynyň Galkynyşy döwründe bolsa, ýörände seýkin basýan, çapanda ýelden ýüwrük atlarymyz toý-dabaralarymyzyň bezegi, halkymyzyň milli buýsanjy, uçar ganatydyr. Her ýylyň aprel aýynyň soňky ýekşenbesinde ýurdumyzda Türkmen bedewiniň milli baýramy bellenilip geçilýär.
Bedew baýramçylygy mynasybetli, 2022-nji ýylyň 18-nji aprelinde Türkmenistanyň Daşary işler ministrliginiň Halkara gatnaşyklary institutyň Jemgyýeti öwreniş ylymlary kafedrasynyň gurnamagynda «Behişdi bedewler- milli buýsanjymyz» atly ylmy seminar geçirildi. Ylmy seminaryň dowamynda türkmen bedewleriniň owadanlygy, ýyndamlygy, duýgurlygy hem-de at münmegiň saglyga peýdasy barada kafedranyň professor-mugallymlary we institutyň talyp ýaşlary gyzykly çykyş etdiler. Arkadag Prezidentimiziň «Ahalteke bedewi – biziň buýsanjymyz we şöhratymyz», «Ganatly bedewler» hem-de «Atda wepa-da bar, sapa-da» atly kitaplary barada täsirli gürrüňler edildi. Şeýle-de ylmy maslahatyň dowamynda institutyň talyp ýaşlary tarapyndan taýýarlanan «Ganatly bedewler» atly edebi çykyşa tomaşa edildi.
Täçnabat PAÝTYKOWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş
ylymlary
kafedrasynyň uly mugallymy.