12-nji aprel – Kosmonawtika güni
12-nji aprel dünýäniň köp ýurtlarynda Kosmonawtika güni hökmünde bellenilýär. Bu sene adamzat taryhynda ilkinji kosmosa uçuş bilen baglanyşyklydyr. 1961-nji ýylyň 12-nji aprelinde sowet kosmonawty Ýuriý Gagarin "Wostok-1" kosmos gämisi bilen Ýeriň daşyndan üstünlikli aýlanyp, taryha ilkinji kosmonawt hökmünde girdi. Bu waka diňe bir Sowet Soýuzy üçin däl, eýsem bütin adamzat üçin ägirt uly öňegidişlik boldy.
Ýuriý Gagariniň uçuşy bary-ýogy 108 minut dowam edipdir. Ol uçuş wagtynda 327 kilometr beýiklikde bolup, Ýeriň daşyndan bir doly aýlaw edipdir. Bu waka adamzadyň kosmos giňişligine bolan ilkinji gadamy hökmünde bellenilýär.
Bu şanly waka hormat goýmak maksady bilen, 1962-nji ýylda Sowet Soýuzynda 12-nji aprel «Kosmonawtika güni» hökmünde resmi ýagdaýda yglan edilýär. Soňra bu sene halkara derejesinde hem giňden bellenilip başlanýar. 2011-nji ýylda BMG tarapyndan hem 12-nji aprel «Bütindünýä adamyň kosmosa ilkinji sapary güni» hökmünde ykrar edilýär.
Kosmonawtika güni diňe bir Gagariniň uçuşyny hatyralamak bilen çäklenmän, eýsem, ylym-bilim, tehnologiýa we parahatçylykly maksatlar bilen kosmos giňişliginiň özleşdirilmegine uly ähmiýet berilýändigini görkezýär. Bu sene ýaş nesillerde ylma bolan gyzyklanmany artdyrmak we täze açyşlara ruhlandyrmak üçin hem giňden ulanylýar.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
III ýyl talyby.