Ýolumyz — ösüş, güýjümiz — bilim, maksadymyz — üstünlik
Adamzadyň ösüş ýolunda iň uly baýlyk — bilim, paýhas we döredijilik ukyby. Häzirki döwürde islendik jemgyýetiň hem-de ýurduň ösüşiniň esasy şertleriniň biri bilimli, başarnykly we maksada okgunly nesli terbiýelemekden ybaratdyr. Hormatly Prezidentimiziň ýurdumyzyň mekdep okuwçylaryna, talyp ýaşlaryna, mugallymlaryna we bilim işgärlerine iberen Gutlagynda: «Bilim ynsan paýhasynyň dowamatly ösüşidir, geçmişiň tejribesi bilen geljegiň innowasiýalaryny birleşdirýän köprüdir» diýlip nygtalmagy bilimiň ýokary ähmiýetine ünsi çekýär. Sebäbi bilim adama täze mümkinçilikleri açýan güýç, ösüş ýolunda ýol görkezýän ygtybarly daýançdyr. Şoňa görä-de, «Garaşsyz, baky Bitarap Türkmenistan — bedew batly at-myradyň mekany» ýylymyzyň sahawatly güýz paslynyň ilkinji günleri mukaddes Garaşsyzlygymyzyň berkararlygyny, milli bilim ulgamynyň okgunly ösýändigini alamatlandyrýan wakalar bilen garşylandy.
TÄZE EÝÝAMYŇ BINAGÄRLIK OJAGY
Her bir beýik eser, ilki bilen, ynsan kalbynda, aňynda we arzuwynda döreýär. Soňra şol arzuw pikir bolýar, pikir bolsa zähmet arkaly hakykata öwrülýär. Binagärlik işine şu filosofik nukdaýnazardan seredenimizde, onuň döwrüň ruhuny, halkyň dünýägaraýşyny we geljege bolan ynamyny şekillendirýän beýik sungatdygyna göz ýetirip bileris. Bu pikirimizi paýtagtymyzda açylyp ulanmaga berlen Türkmen döwlet binagärlik-gurluşyk institutynyň täze binalar toplumynyň mysalynda hem esaslandyrmak mümkin. Täze toplumyň binagärlik keşbi döwrebaplygyň we milli äheňleriň sazlaşygyny özünde jemleýär. Aýratyn-da, ýokary okuw mekdebiniň baş binasynyň depesinde binagärlik hem-de inženerçilik senediniň esasy nyşany bolan sirkulyň we ölçeg guralynyň şekiliniň ýerleşdirilmegi çuňňur filosofik nazaryýete esaslanýar.
Türkmen döwlet binagärlik-gurluşyk institutynyň täze binalar toplumy halkara güwänamalaryň ençemesine mynasyp boldy. Buýsanç bilen bellesek, bu institut Türkmenistanda we GDA ýurtlarynda bir wagtda bäş halkara standart boýunça sertifikatlaşdyrylan ilkinji ýokary okuw mekdebidir. Şunda täze binalar toplumynyň hil dolandyryş ulgamy, daşky gurşawy dolandyrmak ulgamy, zähmet howpsuzlygy we saglygy goramak dolandyryş ulgamy, bilim guramalary üçin dolandyryş ulgamy, maglumat howpsuzlygyny dolandyrmak ulgamy göz öňünde tutuldy.
Türkmenistanyň at gazanan arhitektory hormatly Prezidentimiziň gatnaşmagynda täze bilim şäherçesiniň ulanmaga berilmegi ýaşlaryň döwrebap bilim almagy, ylmy gözlegler bilen meşgullanmagy we hünär taýdan kämilleşmegi üçin döredilýän mümkinçilikleriň nobatdaky aýdyň beýanydyr. Döwrebap okuw otaglary, ýöriteleşdirilen barlaghanalar, kitaphanalar, sport we durmuş maksatly desgalar ýaşlaryň bilim almagy üçin amatly şertleri döredýär. Bu ýerde bilim alýan talyplar geljekde ýurdumyzyň gurluşyk, binagärlik we senagat pudaklarynyň ösüşine mynasyp goşant goşjak hünärmenler bolup ýetişerler.
JEÝHUN BOÝUNDAKY BILIM ŞÄHERÇESI
Hemmämiziň ýadymyzdadyr, Gahryman Arkadagymyz 2022-nji ýylyň 9-njy iýunynda Lebap welaýatyna iş saparyny amala aşyryp, Seýitnazar Seýdi adyndaky Türkmen döwlet mugallymçylyk institutynyň talyplarydyr mugallymlary bilen duşuşypdy. Bu şanly waka baýry mugallymçylyk institutynyň taryhyna altyn harplar bilen ýazyldy. Şonda Milli Liderimiz Türkmenistanyň Gahrymany, Türkmenistanyň halk ýazyjysy Gözel Şagulyýewanyň hem-de Türkmenistanyň Gahrymany Çynar Rustemowanyň şu instituty tamamlandyklarynyň buýsançly ýagdaýdygyny, olara Watanymyzyň özygtyýarlylygyny, konstitusion gurluşyny, döwlet Garaşsyzlygyny hem-de hemişelik Bitaraplygyny berkitmäge goşan uly şahsy goşantlary üçin şeýle belent atlaryň dakylandygyny nygtapdy. Söhbetdeşligiň dowamynda alym Arkadagymyz institutyň halkara ölçeglere laýyk gelýän täze binasyny gurmagyň maksadalaýyk boljakdygyny belledi.
Şundan köp wagt geçmänkä, Gahryman Arkadagymyzyň döwletli başlangyjy, Arkadagly Gahryman Serdarymyzyň Karary bilen 2023-nji ýylyň 1-nji sentýabrynda dabaraly ýagdaýda Seýitnazar Seýdi adyndaky Türkmen döwlet mugallymçylyk institutynyň täze binalar toplumynyň gurluşygyna badalga berildi. Ýakynda bolsa Türkmenabat şäheriniň gündogarynda giden bir şäheri ýatladýan täze binalar toplumy açylyp ulanmaga berildi. Toplumyň taslamasyny düzmek hem-de ony döwrebap enjamlar bilen üpjün edip, ýanaşyk ýerlerini abadanlaşdyryp gurmak babatdaky işler Türkmenistanyň Senagatçylar we telekeçiler birleşmesiniň agzasy bolan «Nahal» hojalyk jemgyýeti tarapyndan ýerine ýetirildi. Ýeri gelende, bu hojalyk jemgyýetiniň Diýarymyzyň gündogar sebitinde ozal hem iri gurluşyk taslamalarynyň birnäçesini üstünlikli amala aşyrandygyny bellemek gerek.
Binagärlik sungatynyň döwrebap we milli nusgalarynyň özara sazlaşygy esasynda gurlan toplumda talyplaryň häzirki zaman ylmynyň çuňluklaryna aralaşmaklary, medeniýetli dynç almaklary, sport bilen meşgullanmaklary üçin ähli şertler döredildi. Açylyş dabarasynda institutyň halkara ölçeglerine laýyk gelýändigi barada degişli güwänamalaryň gowşurylmagy aýratyn bellärliklidir. Şeýle hem şol gün Amerikanyň Birleşen Ştatlaryndan, Beýik Britaniýadan, Russiýa Federasiýasyndan, Özbegistan Respublikasyndan gelen myhmanlaryň talyp ýaşlar bilen okuw sapaklaryny geçmekleri, Seýitnazar Seýdi adyndaky Türkmen döwlet mugallymçylyk instituty bilen Russiýa Federasiýasynyň Naberežnyýe Çelny döwlet mugallymçylyk uniwersitetiniň arasyndaky hyzmatdaşlyk boýunça Ähtnama gol çekilmegi milli pedagogikamyzyň dünýä ykrarnamasydyr. Bu ýerde açylan ÝUNESKO bagy bolsa institutyň halkara medeni-ynsanperwer giňişligindäki hyzmatdaşlygyna güwä geçýär.
Baýry mugallymçylyk bilim ojagynyň täze binalar toplumy iň bir gelim-gidimli ýerleriň hatarynda tanalýan «Türkmeniň ak öýi» binasy, «Lebap» söwda we dynç alyş merkezi, köpugurly sport toplumy, «Ruhyýet» köşgi, «Bagt köşgi» bilen bir ugurda ýerleşip, ajaýyp sazlaşygy emele getirmek bilen, Türkmenabat şäheriniň binagärlik görküne görk goşýar.
«BILIMLINIŇ ÝOLY AÇYK»
1-nji sentýabr — tolgundyryjy gün. Ol gün — hakyt ýaz ýakymly güýz güni. Täze okuw ýyly — täze üstünlikleriň badalgasy. Turuwbaşdan ajaýyp üstünliklere beslenýän «Garaşsyz, baky Bitarap Türkmenistan — bedew batly at-myradyň mekany» ýylymyzyň bereketli altyn güýzüniň ilkinji gününde bellenip geçilen Bilimler we talyp ýaşlar güni orta mekdeplere kabul edilen, Gahryman Arkadagymyzyň hem-de döwlet Baştutanymyzyň adyndan «Bilimli» atly kompýuterleri sowgat alan 1-nji synplaryň hem-de ýokary okuw mekdepleriniň talyplary bolmak bagtyna miýesser bolan ýaşlaryň ýürek joşgunlary bilen utgaşyp, özboluşly sazlaşyk emele getirdi. Ýurdumyzyň ähli bilim-terbiýeçilik edaralarynda Bilimler we talyp ýaşlar güni dabaraly bellenilip, ilkinji jaňyň kakylmagy bilen, 2026-2027-nji täze okuw ýylyna badalga berildi.
Häzirki wagtda ylym-bilimi ösdürmezden, çylşyrymly tehnologiýalardan baş çykarýan ýokary derejeli hünärmenleri taýýarlamazdan, dünýäniň okgunly ösüşine goşulmak, döwür bilen aýakdaş gitmek asla mümkin däl. Şoňa görä-de, her ýyl täze bilim ojaklarynyň döwrebap binalarynyň açylyp ulanmaga berilmegi asylly däbe öwrüldi. Ýeri gelende, Ahal welaýatynyň Gökdepe etrabynyň T.Baýramdurdyýew geňeşliginiň Gökdepe obasynda 2 gatly, 960 orunlyk orta mekdebiň, Tejen etrabynyň Garaşsyzlyk geňeşliginde 320 orunlyk täze çagalar bagynyň açylyp ulanmaga berlendigini bellemelidiris. Şeýle hem Daşoguz welaýatynyň Daşoguz şäherinde 240 orunlyk döwrebap çagalar bagynyň, Lebap welaýatynyň Çärjew etrabynyň Hojaili geňeşliginiň Duruýap obasynda 400 okuwça bilim bermäge niýetlenen 28-nji orta mekdebiň, Farap etrabynyň Garamyş geňeşliginiň Bozaryk obasyndaky 600 orunlyk 24-nji orta mekdebiň açylyp ulanylmaga berilmegi ýaş nesilleriň şatlygyny goşalandyrdy.
Görnüşi ýaly, täze okuw ýylynyň ilkinji gününde iň täze taryhymyza ýazylan wakalar ýaş nesiller, olaryň bilim almagy, terbiýelenmegi we hemmetaraplaýyn sazlaşykly ösmegi ugrunda döwletimiziň ägirt uly işleri durmuşa geçirýändiginiň nobatdaky aýdyň güwäsidir. Gahryman Arkadagymyzyň hem-de Arkadagly Gahryman Serdarymyzyň beýik ynamyna ýokary zähmet we döredijilik üstünlikleri bilen mynasyp jogap berýän ýaş nesilleriň bolsa ýoly — ösüş, güýji — bilim, maksady — üstünlik.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň talyby,
«Nesil».