Türkmen - wenger gatnaşyklarynda täze mümkinçilikler
Biziň watanymyz dünýäde halkara gatnaşyklary babatda hoşniýetli hyzmatdaşlyklara, ikitaraplaýyn we köptaraplaýyn gatnaşyklara uly ähmiýet berýänligi bilen giňden tanalýar. Munuň şeýledigine ýurdumyzyň daşary syýasatynda alyp barýan oňyn başlangyçlary, şeýle-de Ýewropa Bileleşiginiň ýurtlary bilen özara gatnaşyklarynyň has-da işjeňleşdirilmegi aýdyň subut edýär. Wengriýanyň Hökümetiniň Baştutanynyň resmi sapary ýurduamyzyň abraýynyň has-da belende galýandygynyň we durmuşa geçirýän daşary syýasatymyzyň netijeliliginiň subutnamasydyr. Mälim bolşy ýaly Türkmenistan bilen Wengriýa respublikasynyň arasynda diplomatik gatnaşyklar Garaşsyzlygyň ilkinji ýyllaryndan has takygy 1992-nji ýylyň maý aýynda başlap özara bähbitli hyzmatdaşlygyň oňyn tejribesi ýola goýulýar. 2023-nji ýylyň 8-9-njy iýunynda Wengriýanyň Hökümetiniň Baştutanynyň Türkmenistana resmi sapary amala aşyryldy. Saparyň dowamynda geçirilen gepleşiklerde energiýa, ulag, derman serişdeleri, dokma senagaty, maýa goýum, oba hojalygy we suw dolandyryşy ýaly möhüm ugurlara has aýratyn üns berildi. Türkmen – wenger ýokary derejedäki gepleşikleriň netijesi boýunça ikitaraplaýyn resminamalaryň ýokarda agzalan ugurlar boýunça birnäçesine gol çekildi. Olaryň arasynda Türkmenistanyň Daşary işler ministrliginiň Halkara gatnaşyklary instituty bilen Wengriýanyň Daşary işler we söwda ministrliginiň Diplomatik akademiýasynyň arasynda diplomatik taýýarlyk ulgamynda hyzmatdaşlyk babatda özara düşünişmek hakynda Ähtnama gol çekilmegi has bellärliklidir. Çünki halkara hyzmatdaşlygynyň baý resminama gory türkmen diplomatiýasynyň milli mekdebiniň işini kämilleşdirmekde hem-de geljekki ussat halkaraçylary taýýarlamakda özüniň hemmetaraplaýyn oňyn netijelerini berýär. Saparyň dowamynda dürli ugurlara degişli gepleşikleriň geçirilmegi we olaryň netijesinde ikitaraplaýyn resminamalara gol çekilmegi türkmen-wenger bähbitli gatnaşyklaryny mundan beýläk-de kämilleşdirmäge ýardam berer.
Merjen Durdyýewa,
Türkmenistanyň Daşary işleri ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş kafedrasynyň öwreniji mugallymy