Talyp boldum, baş arzuwyma ýetdim!
Ýaşlaryň bilim hazynasyna eýe bolmak arzuwynyň amala aşmagy, döwrebap bilim almagy, giň dünýägaraýyşly, ökde hünärmenler bolup ýetişmegi üçin Arkadagly Serdarymyzyň baştutanlygynda ýurdumyzda uly işler durmuşa geçirilýär.
Men hem ýurdumyzda zehinli ýaşlary ýüze çykarmak maksady bilen geçirilýän birnäçe bäsleşiklere uly höwes bilen gatnaşdym. 2022-nji ýylda men türkmen halkynyň Milli Lideri, Gahryman Arkadagymyzyň ýörite karary bilen Türkmenistanyň Daşary işler ministrliginiň Halkara gatnaşyklary institutynda döredilen Ýaş diplomatlaryň mekdebiniň gurnamagynda geçirilen «Parahatçylygyň ýaş çaparlary» atly akyl-paýhas bäsleşiginiň II möwsüminiň «Gadymy Marguşdan Parfiýa çenli: parahatçylyk sungatynyň siwilizasion ýörelgeleri» atly temasy boýunça I oýnuna gatnaşdym. 2023-nji ýylda mekdep okuwçylarynyň arasynda geçirilen «Altyn asyryň altyn zehinleri» atly ders bäsleşiginiň döwlet tapgyrynda iňlis dili dersinden II orna mynasyp boldum. Ynha, şeýle bäsleşiklere gatnaşmagym meniň ähli babatda kämilleşmegim üçin uly itergi boldy.
Ak mekdebi tamamlanyňdan soň, ilkinji arzuwlaryň biri-de okuwyňy dowam etdirmek — talyp bolmak. Meniňem bu arzuwym «Arkadag Serdarly bagtyýar ýaşlar» ýylynda hasyl boldy. Men Türkmenistanyň Daşary işler ministrliginiň Halkara gatnaşyklary institutynyň bagtyýar talyby boldum.
Hormatly Prezidentimiziň ykdysadyýetiň ähli ugurlary boýunça zerur bolan hünärmenleri taýýarlamak maksady bilen, ýokary we orta hünär okuw mekdeplerinde täze, döwrebap hünär ugurlaryny kesgitlemek baradaky tabşyryklaryna laýyklykda, täze okuw ýylynda hünärleriň ençemesiniň açylýandygyny aýtmak has-da guwandyryjydyr. Täze hünärleriň açylmagy okuwa kabul edilýän ýaşlaryň sanynyň artmagyny şertlendirýär.
Geljekde ukyp-başarnygymy, bilim derejämi artdyryp, bar ünsümi saýlap alan hünärimi kämilleşdirmäge gönükdirmek isleýärin. Bular üçin bizde giň mümkinçilikler bar. Watanyň geljekki ykbalyny biz — ýaşlara ynanýan Gahryman Arkadagymyz, hormatly Prezidentimiz okamaga, öwrenmäge ähli şertleri döredip berýär. Men hem pursatdan peýdalanyp, türkmen halkynyň Milli Lideri, Gahryman Arkadagymyza, Arkadagly Serdarymyza köp sagbolsun aýdýaryn. Goý, Gahryman Arkadagymyzyň, Arkadagly Serdarymyzyň janlary sag, ömürleri uzak bolsun, tutýan tutumly işleri hemişe rowaçlyklara beslensin!
Mähri GUZYÇYÝEWA,
Türkmenistanyň Daşary işler ministrliginiň
Halkara gatnaşyklary institutynyň I ýyl talyby.