«Magtymguly, söz binýadyň, agzynda ýakynyň, ýadyň» atly brain ring bäsleşigi geçirildi
Bilşimiz ýaly, üstümizdäki 2024-nji ýylda Magtymguly Pyragynyň doglan gününiň 300 ýyllygy ata Watanymyzda giňden baýram edilýär. Ýurdumyzyň ähli pudak edaralarynda şeýle-de Türkmenistanyň daşary ýurtda ýerleşýän diplomatik wekilhanalarynyň guramagynda Magtymguly Pyragynyň döredijiligini wagyz etmek boýunça birnäçe dabaraly çäreler geçirilýär. BMG-niň ylym, bilim we medeniýet boýunça ýöriteleşdirilen edarasy bolan ÝUNESKO-nyň 2024-2025-nji ýyllarda belleniljek şanly seneleriniň arasynda Magtymguly Pyragynyň doglan gününiň 300 ýyllyk ýubileýiniň hem bolmagy söz ussadynyň beýik şahsyýetdigini äşgär edýär.
Magtymguly Pyragynyň doglan gününiň 300 ýyllyk ýubileý toýy mynasybetli, 2024-nji ýylyň 14-nji maýynda Türkmenistanyň Daşary işler ministrliginiň Halkara gatnaşyklary institutynyň «Parahatçylyk medeniýeti» ÝUNESKO klubynyň guramagynda «Magtymguly, söz binýadyň, agzynda ýakynyň, ýadyň» atly brain ring bäsleşigi geçirildi. Oňa institutymyzyň «Parahatçylyk medeniýeti» ÝUNESKO klubynyň başlygy Aýgözel Aşirowa we Dünýä dilleri kafedrasynyň mugallymy Nursoltan Täşliýewa emin agzalyk etdiler. Bäsleşige institutymyzyň ähli fakultetlerinden düzülen «Arkadag» we «Peýkam» atly toparlar gatnaşdy. Toparlar 5 şert boýunça özara bäsleşdiler. Emin agzalaryň gelen netijeleri boýunça «Peýkam» topary ýeňiji diýip yglan edildi. Ýeňijilere institutymyz tarapyndan gymmat bahaly sowgatlar gowşuryldy.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.