Halkara ýol yşygy güni
Bilşimiz ýaly her ýylyň 5-nji awgustda bütin dünýäde halkara ýol yşygy güni bellenilýär. 1914-nji ýylyň 5-nji awgustynda Amerikanyň Kliwlend şäherinde gyzyl we ýaşyl çyralary bolan häzirki zaman ýol yşygy enjamlarynyň ilkinjisi peýda boldy we yşyk ýakylanda ses signalyny çykarýardy. Häzirki zaman çyralaryna meňzeş üç reňkli ýol yşygy 1920-nji ýylda peýda boldy.
Şeýle hem bu optiki duýduryş enjamy pyýada geçelgelerindäki adamlar we beýleki ýol ulanyjylary awtoulaglaryň hereketine gözegçilik etmek üçin niýetlenendir. Ýol yşygy demir ýollarda, ýük daşamakda we ugrukdyryjy (nawigasiýa) ulgamynda hem ulanylýar we ähli ýol ulanyjylaryna ýol hereketiniň düzgünleriniň talaplaryny berk berjaý etmegiň, gadagan ýol yşygynda çatrykdan geçmeli däldigini ýatladýar.
Mälim bolşy ýaly, Hormatly Prezidentimziň ýolbaşçylygynda Türkmenistan döwletimiz hem ýol howpsuzlygyny ýokarlandyrmak işine işjeň gatnaşýar. Şeýlelik bilen, her ýylyň sentýabr aýynda ýol hadysalarynyň öňüni almak, raýatlaryň saglygyny goramak we berkitmek maksady bilen ýokary derejeli çäreler geçirilýär. “Ýol hereketiniň howsuzlygy-ömrümiziň rahatlygy” aýynyň geçirilmeginiň, ýurduň jemgyýetçilik ugruna gönükdirilen syýasatynyň aýdyň beýanydygyny aýratyn bellemelidiris.Ýollarda özüňi alyp barmagyň kadalaryny giňden wagyz etmäge gönükdirilen bu çäreleriň çäginde ähli bilim edaralarynda we mekdebe çenli çagalar baglarynda polisiýanyň ýol gözegçilik gullugynyň wekilleriniň we lukmançylyk işgärleriniň gatnaşmagynda dürli çäreleri, konferensiýalar, tematiki ýaryşlar geçirilýär.
Kerim BAÝMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.