HALKARA ULAG ULGAMYNDAKY KÖPUGURLY HYZMATDAŞLYK
2022-nji ýylyň 23-25-nji noýabry aralygynda Tailand Patyşalygynyň Bangkok şäherinde BMG-niň Aziýa we Ýuwaş ummany sebiti üçin Ykdysady we durmuş meseleleri boýunça komissiýasynyň (UNESCAP) Ulag boýunça komitetiniň 7-nji mejlisi geçirildi. Bu mejlise 53 ýurduň degişli edaralarynyň wekilleri bilen bir hatarda, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň wekilleri göni we wideoaragatnaşyk arkaly gatnaşdylar.
Bu halkara maslahatda BMG-niň Aziýa we Ýuwaş ummany sebiti üçin Ykdysady we durmuş meseleleri boýunça komissiýasynyň 2022-2026-njy ýyllar üçin sebit Maksatnamasynyň çäginde «Özbegistan — Türkmenistan — Eýran — Hindistan» we beýleki halkara ulag geçelgelerini ösdürmek boýunça taslamalara seredildi. Mejlise gatnaşyjylar sebitde ulag ulgamyny ösdürmegiň strategik ähmiýetini we Aziýa-Ýuwaş ummany sebitinde ulag düzümini ýokary derejeli ösdürmek boýunça ministrler derejesinde kabul edilen Jarnamanyň çägindäki durmuşa geçirilmeli wezipeleri ara alyp maslahatlaşdylar. Mejlisde Durnukly ösüş maksatlaryna ýetmek üçin Türkmenistanda alnyp barylýan işler barada giňişleýin maglumat berildi.
Ýurdumyzda ulag ulgamy binýatlaýyn pudak bolup, ol senagatyň, oba hojalygyň, söwdanyň we durmuş ulgamyň ösüşiniň deňagramlylygyny üpjün edýär. Ol ykdysadyýetiň ähli pudaklarynyň gurluşyny emele getirýär, ýük daşalyşyny we ýolagçy gatnadylyşyny amala aşyrýar, saglygy goraýşyň, bilimiň we durmuş ulgamynyň beýleki jähtleriniň amatly hereket etmegine esas döredýär, maddy önümçilikde ykdysady işleriň özarabaglanyşygyny, döwlet edaralarynda we hojalyk dolanşygynda çalt dolandyryşy üpjün edýär.
Mekan ROZYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
I ýyl talyby.