GAHRYMAN ARKADAGYMYZYŇ UMUMY OKUW SAPAGY — PARAHATÇYLYK, YLYM WE TERBIÝE MEKDEBI
Her ýylyň güýz paslynyň ilkinji gününde eziz Diýarymyzda uly şatlyk-şowhun bilen Bilimler we talyp ýaşlar güni dabaraly ýagdaýda bellenilýär. Hut şu günde ýurdumyzyň sarpasyny has belentlere göterýän ähli orta we ýokary okuw mekdeplerinde täze okuw ýylynyň başlanandygyny buşlaýan ilkinji jaňlar kakylyp täze okuw ýylynyň başlanýandygyny habar berýär.
Eziz Watanymyzyň ähli künjeklerinde ýaşlaryň geljege bolan umyt-arzuwlaryny durmuşa geçirmek, diýarymyzyň ykbalyny kemala getirýän ylym-bilime bolan söýgüsini has-da berkitmek üçin täze mümkinçilikleriň bosagasynda jemlenişýärler.
1-nji sentýabrda Hormatly Prezidentimiziň gatnaşmagynda Türkmen döwlet binagärlik-gurluşyk institutynyň ham-da Seýitnazar Seýdi adyndaky Türkmen döwlet mugallymçylyk institutynyň täze döwrebap binalar toplumy dabaraly açyldy. Bilimler we talyp ýaşlar güni bilen bir wagtda geçirilen bu dabaralar, şeýle hem, täze döwrebap mekdepleriň we çagalar baglarynyň ulanyşa berilmegi, milli bilim ulgamyny dünýä ülňülerine laýyklykda ösdürmäge we onuň maddy-tehniki binýadyny berkitmäge gönükdirilen döwlet syýasatynyň dabaralanýandygynyň aýdyň subutnamasydyr. Şeýle hem bu waka 2026–2027-nji okuw ýylynyň düşümli başlangyjy boldy.
Bellemeli zatlaryň biri hem, 2-nji sentýabrda Arkadag şäheriniň «Ruhyýet» köşgünde Bilimler we talyp ýaşlar güni hem-da täze okuw ýylynyň başlamagy mynasybetli umumy okuw sapagy geçirildi. Bu sapak ýurdumyzyň parahatçylyk söýüjilikli daşary syýasatyna we ýaşlaryň mähriban Watanynyň, jemgyýetiň, ata-enesiniň we maşgalasynyň öňündäki mukaddes borçlaryna bagyşlandy.
Gahryman Arkadagymyz watandaşlarymyza, mugallymlara, talyplara we okuwçylara ýüzlenip, Berkarar döwletiň täze eýýamynyň Galkynyşy döwründe Bilimler we talyp ýaşlar gününiň giňden bellenilýändigini nygtady. Gahryman Arkadagymyz «Garaşsyz, baky Bitarap Türkmenistan – bedew batly at-myradyň mekany» şygary astynda geçýän täze okuw ýyly bilen tüýs ýürekden gutlap, olara berk jan - saglyk we Watanyň ösüşine mynasyp goşant goşmakda uly üstünlikleri arzuw etdi.
Umumy okuw sapaga Gahryman Arkadagymyz watançylyk düşünjesine aýratyn üns berip, Watana bolan söýgi, milli gymmatlyklara hormat goýmak, bilime ymtylmak we döredijilikli zähmet çekmek ýaly sypatlaryň uly ähmiýete eýedigini belledi. Beýik akyldar şahyr Magtymguly Pyragynyň agzybirlik we garaşsyzlyk baradaky arzuwlarynyň bu gün doly amala aşandygyny nygtap, Watana bolan beýik söýgüniň halkyň beýik ykbalyny üpjün edýändigini görkezdi.
Gahryman Arkadagymyz Garaşsyz, Bitarap Türkmenistanyň halkara giňişligindäki eýeleýän orny, Bitaraplyk syýasaty we ýaş nesliň öňünde durýan möhüm wezipeler barada durup geçdi.
Türkmen halkynyň Milli Lideri, Gahryman Arkadagymyzyň bellemegine görä, Türkmenistanyň hemişelik Bitaraplygy halkymyzyň taryhy ykbaly, beýik buýsanjy we uly gazananydyr. Garaşsyz ýurdumyzyň Bitaraplyk derejesi 1995-nji ýylda Birleşen Milletler Guramasyna agza döwletleriň biragyzdan goldamagynda ykrar edildi. Bu halkara gatnaşyklarynda taryhy waka boldy.
Umumy okuw sapagy Gahryman Arkadagymyzyň şu pähimleri bilen dowam etdirildi: «Men biziň Bitaraplygymyzyň türkmen halkynyň taryhy ykbalydygyny belledim. Bu tötänlik däl. Çünki Bitaraplyk halkymyzyň taryhy ýoly bilen kesgitlendi, ol bize babalarymyzdan miras galdy. Beýik akyldar şahyrymyz Magtymguly Pyragy hem muny öz goşgularynda wasp edipdir. Ol diňe bir şahyr we akyldar bolman, eýsem köp ýurtlara syýahat eden ajaýyp diplomat hem bolupdyr. Biziň Bitaraplygymyzyň mazmuny hem hut şundadyr».
Magtymguly Pyragynyň filosofik we pedagogik garaýyşlary, şeýle hem, türkmen durmuşy baradaky pikirleri beýik şahyryň dünýäniň ruhy we medeni hazynasyna goşan uly goşandyny görkezýär.
Türkmen halkynyň Milli Lideri: «Türkmenistan üçin Bitaraplyk – bu parahatçylygyň, içki durnuklylygyň, agzybirligiň we birleşigiň kepilidir. Türkmen Bitaraplygynyň netijeli häsiýeti dünýäde giňden goldanylýar we ykrar edilýär» diýip belledi. Milli Liderimiz ýurdumyzyň parahatçylyk söýüjilikli daşary syýasatynyň esasy ýörelgeleriniň gepleşikler, özara hormat goýmak we dostlukly gatnaşyklara berkidilýändigini aýtdy.
Bu hakykat BMG-niň Baş Assambleýasynyň 1995-nji ýyldan bäri Türkmenistanyň Bitaraplygyny goldap birnäçe taryhy kararnamalary kabul edendigi bilen hem tassyklanýar. Munuň özi ýurdumyzyň parahatçylygy saklamakda ygtybarly hyzmatdaş we hoşniýetli gepleşikleriň tarapdary hökmünde dünýä özüni tanatmagynyň aýdyň subutnamasydyr.
Bitaraplyk hukuk dereje halkara bileleşiginde milli özbaşdaklygyň bir bölegine öwrüldi. Sabyr-takatly, dostlukly, hoşniýetli goňşuçylyk ýörelgelerine wepalylyk – bu häsiýetler hemişe türkmen halkyna mahsus bolupdyr. Bitaraplyk derejesi milli jemgyýetçilik aňynda giň goldaw tapýar we döwleti daşarky dünýä üçin durnukly görkezýär.
Gahryman Arkadagymyz ýaşlaryň döwrebap bilim almagy, täze tehnologiýalary özleşdirmegi, ylmy barlaglar bilen meşgullanmagy we innowasion pikirleri durmuşa geçirmegi üçin ähli şertleriň döredilýändigini belledi. Ol Türkmenistanda «Akyldar jemgyýet» konsepsiýasyny ösdürmegiň we halkara ylmy-bilim hyzmatdaşlygyny giňeltmegiň möhümdigini nygtady.
Ýurdumyzda milli bilim ulgamyny kämilleşdirmek, giň dünýägaraýyşly, dolandyryş başarnygy bolan we innowasion tehnologiýalar bilen işläp bilýän ýaşlary terbiýelemek boýunça uly işler amala aşyrylýar. «Ýaşlar barada döwlet syýasaty hakynda» Türkmenistanyň Kanunyna laýyklykda, ýaş nesliň hukuklaryny we erkinliklerini üpjün etmek, olaryň döwlet we jemgyýetçilik durmuşyna doly gatnaşmagy üçin amatly şertler döredilýär.
Umumy okuw sapagynda Gahryman Arkadagymyz türkmen halkynyň milli bilim ulgamynyň taryhy ýolunyň örän gadymy we şanlydygyny belledi. Ylmyň, bilimiň, medeniýetiň we sungatyň ilkinji binýatlary Jeýtun we Änew medeniýetleriniň, Marguş, Altyndepe we Horezm siwilizasiýalarynyň döwründe tutulypdyr. Milli bilim ulgamy Parfiýa imperiýasynyň, Gaznalylar, Garahanlylar, Beýik Seljuklar döwletleriniň, Horezmşalaryň, Garagoýunly we Akgoýunly döwletleriniň hem-da Hindistandaky taryhy soltanlyklaryň pedagogik dessurlaryna esaslanyp kämilleşipdir. Gahryman Arkadagymyz ýaşlara eýýäm X asyrda Nusaý, Merw, Sarahs, Amul, Dehistan, Gürgenç we Abiwerd ýaly iri türkmen merkezlerinde ilkinji bilim edaralarynyň – medreseleriň gülläp ösendigini gürrüň berdi. Bu gadymy bilim ojaklarynda ahlak arassalygyna, adamlara bolan hormat-sarpa we ýagşy bilen ýamana göz ýetirmäge uly üns berlipdir.
Milli Liderimiziň bellemegine görä, bilim biziň iň gymmatly mirasymyzdyr, hakyky adamyň bagty bolsa akyl çuňlugyna we ahlak terbiýesine baglydyr. «Akyl bahasyzdyr» diýen atalar sözünden ugur alyp, döwletimiz bilimli, hemmetaraplaýyn ösen nesli terbiýelemäge uly üns berýär. Türkmen ýaşlaryny Watanyň gelejegi hökmünde häsiýetlendirip, Gahryman Arkadagymyz olaryň bilimi, zähmeti we döredijiligi bilen ýurdumyzyň abraýynyň mundan beýläk-de beýgeljekdigine uly ynam bildirdi.
Bu umumy sapak ýaşlary watançylyk ruhunda terbiýelemekde we olarda milli gymmatlyklara bolan söýgüni ösdürmekde möhüm waka hökmünde taryha girdi.
Şeýlelikde, bu mazmunly ders Türkmenistanyň şanly taryhy köklerini we geljek baradaky belent maksatlaryny birleşdirip, hemmämiz üçin uly ylham çeşmesi boldy. Gahryman Arkadagymyzyň aýdan pähimli sözleri gatnaşyjylaryň ýüreginde öçmejek yz galdyrdy. Şol ýaşlar täze okuw ýylyna ädim ädýärler, olar ata-babalarymyzyň baky gymmatlyklaryny göterip, Garaşsyz Watanymyz üçin has-da aýdyň gelejegi gurmaga taýýardyrlar.
Biziň ýaş neslimiz watançylygyň, ahlaklylygyň, beden we ruhy sagdynlygyň beýik nusgasy bolmalydyr. Olar milli ýörelgelerimizi mynasyp dowam etdirip, ýurdumyzyň we türkmen halkynyň dünýäde abraýyny dabaralandyrmalydyrlar. Sebäbi bu günki ýaşlar ýurdumyzyň geljegidir. Olaryň bilimi, zähmetsöýerligi we watançylygy biziň üstünliklerimizi kesgitleýär.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy