DURNUKLY SYÝAHATÇYLYGYŇ BÜTINDÜNÝÄ GÜNI
Syýahatçylyk häzirki döwürde iň ösen hyzmat ediş pudaklaryň hataryna girýär. Bilşimiz ýaly 1970-nji ýylyň 27-nji sentýabrynda Birleşen Milletler Guramasynyň Bütindünýä syýahatçylyk guramasynyň (UNWTO) düzgünnamalary kabul edildi. Onuň baş maksady syýahatçylygy ykdysady ösüşiň we daşky gurşawyň durnuklylygynyň hereketlendirijisi hökmünde ösdürmekligi gazanmakdyr. Şondan 10 ýyl soňra has takygy, 1980-nji ýyldan bäri her ýylyň 27-nji sentýabrynda Halkara syýahatçylyk güni bellenilip geçilýär. Bütindünýä syýahatçylyk gününiň maksady syýahatçylygyň halkara jemgyýetçiliginiň gymmatlyklaryna täsir etmekdäki ähmiýetini barada habarlylygy ýokarlandyrmakdan ybarat.
Häzirki döwürde Türkmenistanda syýahatçylyk pudagyny ösdürmeklige aýratyn üns berilýär. 2020-nji ýylyň 1-nji maýynda Türkmenistanyň paýtagty Aşgabat şäheri Syýahatçylyk şäherleriniň Bütindünýä Federasiýasynyň agzalygyna kabul edildi. Bu abraýly halkara guramadaky agzalyk şähere dürli syýahatçylyk ugurlarynyň ösdürilmegine we ýaýbaňlandyrylmagyna, şonuň ýaly-da şäheriň syýahatçylyk görküniň işlenilip düzülmeginde täze mümkinçilikleri açýar.
Ýurdumyzda syýahatçylygyň dürli görnüşleri häsiýetlendirilýär. Olara taryhy-medeni ýadygärliklere syýahat, şypahanalarda dynç almak, sport syýahaty, dag-çöl landşaftyna syýahat, tebigy ýadygärliklere syýahat we ş.m. degişlidir.
Türkmenistan medeni-taryhy ýadygärlikler bilen bir hatarda özüne çekiji tebigy ýadygärliklere hem baýdyr. Köpetdagyň ajaýyp künjekleri, Garagum çölüniň ösümlik we haýwanat dünýäsi, Amyderýanyň kenar ýakalary, Köýtendag, Günorta-Günbatar Türkmenistanyň subtropiki ýerleri, şeýle hem Hazar deňziniň türkmen kenary ekologik syýahatçylyk üçin örän täsirli ýerlerdir. Mundan başga-da Türkmenistanda ekosyýahatçylyk, esasan, Bathyz, Repetek, Sünt-Hasardag we beýleki milli goraghanalarda hem guralýar. Ýurdumyzyň geoykdysady strategiýasynyň üstünlikli durmuşa geçirilmegi syýahatçylyk hyzmatlarynyň ösmegine we kämilleşmegine uly mümkinçilikler döredilýär.
Nurmämmet ANNADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň V ýyl talyby.