"Awaza – 2023" atly halkara tans we folklor festiwalynyň ähmiýetine bagyşlanan okuw sapagy
2023-nji ýylyň 4-nji iýulynda Türkmenistanyň Daşary işler ministrliginiň Halkara gatnaşyklary institutynda 13-16-njy iyun aralygynda dowam eden “Awaza – 2023” atly halkara tans we folklor festiwalynyň ähmiýeti barada okuw sapagy geçirildi. Okuw sapagyny institutyň Halkara ykdysady gatnaşyklary fakultetiniň uly mugallymy Mährijemal Mämmedowa institutyň Halkara ykdysady gatnaşyklary hünärinde okaýan talyplar bilen bilelikde geçdi. Festiwalyň birinji gününiň meýilnamasyna laýyklykda, ilki bilen oňa gatnaşyjy folklor we tans toparlarynyň bilelikde ýerine ýetiren «Türkmenistan — dost-doganlyk mekany» atly edebi aýdym-sazly kompozisiýasy hemmelerde uly täsir galdyrandygy, halkara festiwala ýurdumyzyň birnäçe tans we folklor toparlary bilen birlikde, Russiýanyň Garri Polewoý adyndaky «Ogonki» rus tans topary, Gazagystanyň «Jorga» we «Aktau sazy» halk folklor toparlary, Täjigistanyň «Lola» tans we folklor topary, Rumyniýanyň «Transilwaniýa» folklor topary, RF-niň Tatarystan Respublikasynyň «Riwaýat», Eýranyň «Zendegi Mazandaran» tans we aýdym-saz topary, Hindistanyň «Bihu» folklor we tans topary, Hytaýyň Sinhaý welaýatynyň medeniýet, sungat we syýahatçylyk mekdebiniň tans topary, Özbegistanyň «Parwoz» hem-de «Bogdon» halk aýdym we tans toparlarynyň gatnaşandygy barada, şeýle-de, medeni çäräniň çäklerinde «Folklor döredijiliginiň we halk tansynyň dessurlary» atly halkara ylmy-amaly maslahatyň, festiwala gatnaşýan türkmenistanly hem-de daşary ýurtly tans we folklor toparlarynyň konsertiniň, daşary ýurtly tans goýujylaryň türkmen kärdeşleri bilen döredijilik duşuşygynyň we ussatlyk sapaklarynyň geçirilendigi, şeýle-de myhmanlaryň «Awaza» milli syýahatçylyk zolagy bilen tanyşdyrylmagy we Awaza derýasynda edilen gämili gezelenjiň täsiri hakynda gürrüňler edildi. Ýokary derejede geçirilen halkara festiwalyň ýurdumyzyň medeni diplomatiýasynyň ösmegine uly ýardam etjekdigi barada bellenilmegi bilen okuw sapagy jemlenildi.
- BATYROWA ŞEKER,
- Türkmenistanyň Daşary işler ministrliginiň
- Halkara gatnaşyklary institutynyň
- Halkara ykdysady gatnaşyklary fakultetiniň II ýyl talyby.