«ASYRLARA ÝÖRELGE — NESILLERE GÖRELDE» ATLY BÄSLEŞIK YGLAN EDILDI
Türkmenistanyň Prezidentiniň halkymyzyň milli mirasy, medeni gymmatlyklary baradaky maglumatlary ýerlerden toplamak, öwrenmek we wagyz etmek baradaky tabşyryklaryndan ugur alyp, «Arkadag Serdarly bagtyýar ýaşlar» ýyly mynasybetli, Türkmenistanyň Medeniýet ministrligi we Türkmenistanyň Magtymguly adyndaky Ýaşlar guramasynyň Merkezi Geňeşi türkmen halkynyň maddy däl medeni mirasynyň görnüşlerine degişli bolan maglumatlary toplaýjylaryň, mirasy öwrenijileriň we höwesjeň ýaşlaryň arasynda «Asyrlara ýörelge — nesillere görelde» atly bäsleşigini yglan etdi. Bäsleşik 13 ugur boýunça geçirilip, oňa Türkmenistanyň ýokary okuw mekdepleriniň we ýörite orta hünär okuw mekdepleriniň mugallymlary, talyplary, hünärmenler, höwesjeň ýaşlar gatnaşyp bilerler. Bäsleşige gatnaşyjylar 2023-nji ýylyň 1-nji noýabryna çenli maddy däl medeni mirasyň görnüşleriniň many-mazmunyny, ýerine ýetirilişini, ýasalyş usullaryny tutuşlygyna beýan edýän maglumatlar toplumyny doly tamamlap, Türkmenistanyň Medeniýet ministrliginiň Maddy däl medeni miras müdirligine tabşyrmaly. Bäsleşige ýerlerden gelip gowşan işleri, maglumatlary seljermek we baha bermek boýunça döredilen ýörite toparyň gelen netijesine laýyklykda, bäsleşigiň jemi 2023-nji ýylyň noýabr aýynda jemlener. Bäsleşigiň düzgünnamasy bilen medeniyet.gov.tm saýtyndan dolulygyna tanşyp bilersiňiz.