Türkmenistan Londonda ykdysady we maýa goýum mümkinçilikleri bilen tanyşdyrdy
Hormatly Prezidentimiziň baştutanlygynda maýa goýum syýasatynyň yzygiderli kämilleşdirilmegi, döwrebaplaşdyrylmagy bilen milli ykdysadyýetiň, şeýle-de sebitiň we dünýäniň döwletleriniň arasyndaky maliýe-ykdysady hem-de beýleki ugurlar boýunça gatnaşyklaryň durnukly, sazlaşykly, kadaly ösüşi üpjün edilýär. Her ýyl üçin maýa goýum Maksatnamasy işlenip düzülende, onuň anyk wezipeleri kesgitlenýär, önümçilikde we durmuş ulgamynda meýilleşdirilýän sepgitler anyklanýar. Munuň özi ýurduň makroykdysady görkezijilerini ösdürmäge, ilatyň ýaşaýyş-durmuş şertlerini gowulandyrmaga ýardam berýär.
Maýa goýum işinde daşary ýurtly iri işewür düzümler we abraýly halkara maliýe guramalary bilen gatnaşyklary ýola goýmak möhüm ähmiýetli çäre hasaplanýar. Bu meseläniň üstünlikli çözülmegi diňe bir maýa goýum taslamalarynyň maliýe mümkinçiligini ýokarlandyrman, eýsem, dünýäniň ösen döwletleriniň baý tejribesini öwrenmäge, hünärmenleriň hünär derejesini ýokarlandyrmaga-da zerur şertleri döredýär. Şu maksat bilen biziň Watanymyz dünýä döwletleridir guramalary bilen maýa goýum hyzmatdaşlygyny has-da ösdürmegi göz öňüne tutýar.
Şol maksatdan ugur alyp, 2023-nji ýylyň 22-nji noýabrynda Beýik Britaniýanyň paýtagty London şäherinde “Türkmenistan maýa goýum we ösüş” atly halkara maýa goýum we ösüş forumy geçirildi.
Foruma döwlet dolandyryşy we işewürlik ulgamynda iş alyp barýan 350-den gowrak wekiliýet gatnaşdy. Şeýle hem maýa goýum forumyna dürli ugurlarda işleýän Türkmenistanyň onlarça hususy kompaniýasy we aýry-aýry kärhanalary gatnaşdylar. Olaryň arasynda “Gujurly inžener” HJ, “Döwlet Gurluşyk” we “Mizemez gadam” ýaly gurluşyk kompaniýalary, “Bir Kuwwat” ulag we logistika kompaniýasy, “Balam” , “Owadan ülke” HJ ýaly azyk önümçiligi bilen meşgullanýan kärhanalar, guşçulyk bilen meşgullanýan hojalyk jemgyýeti bolan “Nurly meýdan”, şeýle-de “Ýigit” HJ, “Oguzabat” HJ we “Halkmarket” bellemeklik örän zerurdyr.
Türkmenistanyň Ulag-logistika merkeziniň (TULM) bellemegine görä, “Türkmenistan maýa goýum we ösüş” atly halkara maýa goýum we ösüş forumy halkara platformada ykdysadyýetiniň alty sany pudagynyň täjirçilik mümkinçilikleri bilen tanyşdyrdy. Şol ýerde öňdebaryjy kompaniýalar Türkmenistanyň ýokary derejeli wekilleri bilen duşuşyp, ýurduň geljekdäki ösüş meýilnamalaryny ara alyp maslahatlaşdylar.
Forumyň barşynda infrastruktura we gurluşyk pudagyndaky häzirki taslamalara üns çekildi we halkara işewür toparlary bilen Türkmenistanyň arasynda hyzmatdaşlygyň mümkinçilikleri kesgitlenildi.
Şeýle-de bu çäräniň dowamynda daşary ýurtly maýadarlar türkmen telekeçileriniň gazananlary, türkmen işewürligi bilen maýa goýum hyzmatdaşlygy hem-de ulag we logistika pudagyndaky Türkmenistanyň ösüşi bilen tanyşdylar. Mundan baga-da, foruma gatnaşyjylara “Rysgal” paýdarlar täjirçilik bankynyň we “Türkmenistanyň Ulag-logistika merkezi” açyk görnüşli paýdarlar jemgyýetiniň (TULM) alyp barýan işleri bilen tanyşdyryldy.
Türkmenistanyň maýa goýumyna we ösüşine bagyşlanylan bu halkara forum 22-23-nji noýabr aralygynda geçirildi. Onuň esasy maksady bar bolan hyzmatdaşlygy ösdürmekden we täze hyzmatdaşlygy döretmekden ybaratdyr.
Bu ýerde esasy üns foruma gatnaşyjylardan Türkmenistanyň ösüşine maýa goýmak hem-de hyzmatdaşlyk etmek isleýänleriň arasynda bar bolan we özara gatnaşyklary berkitmekde, döretmekde jemlendi.
London forumy Türkmenistanyň Hökümetiniň wekilleri we dünýäniň öňdebaryjy kompaniýalarynyň bilermenleri bilen duşuşyklar, iş gatnaşyklaryny ýola goýmak, şeýle-de bilimleri we tejribeleri alyşmak üçin bahasyna ýetip bolmajak mümkinçilik boldy.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.