Türkmen - koreý dostlugy: hoşniýetli gatnaşyklaryň nusgasy
Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň goňşy we alys döwletler bilen alyp barýan hoşniýetli we iki taraplaýyn bähbitli gatnaşyklaryň gerimi günsaýyn ilerleýär. Halkara gatnaşyklary ulgamyny has-da ýokarlandyrmak, dünýä döwletleri bilen ysnyşykly hyzmatdaşlyklary has-da berkitmek ýaly meseleler boýunça maksatnamalaýyn işler yzygiderli alnyp barylýar. Daşary gatnaşyklarynda Bitaraplyk syýasatyna esaslanýan Türkmenistan döwletimiziň dürli ugurlarda hyzmatdaşlyk edýän ýurtlarynyň sany barha artýar. Şeýle gatnaşyklara Türkmenistan bilen Koreýa Respublikasynyň arasyndaky ikitaraplaýyn bähbitli, hoşmeýilli gatnaşyklary mysal getirmek bolar. Bu aýdylanlara Koreýa Respublikasynyň Prezidenti hormatly Ýun Sok Ýoluň 10-11-nji iýun aralygynda iki günlük döwlet sapary bilen biziň ýurdumyza gelmegi we iki ýurduň arasynda möhüm meseleleriň ara alnyp maslahatlaşylmagy aýdyň subutnamasydyr.
Türkmenistan bilen Koreýa Respublikasynyň arasyndaky oňyn gatnaşyklaryň kökleri gadymyýete uzaýar. Şol sanda iki dostlukly halkyň arasynda birnäçe umumylyklaryň we meňzeşlikleriň bardygyny-da bellemek gerek. Bu iki halk hem gadymy taryhly, medeni mirasly halkdyr. Türkmenistan we Koreýa Respublikasy täsin ruhy mirasa we maddy medeniýete eýe, bu ulgamda hyzmatdaşlygyň mundan beýläk-de ösdürilmegi iki ýurduň halklarynyň ýakynlaşmagyna hem-de olaryň arasyndaky dostluk gatnaşyklarynyň pugtalandyrylmagyna ýardam edýär. Şunuň bilen baglylykda, her ýyl döredijilik toparlarynyň, şol sanda teatr, tans, folklor-etnografiýa we çeperçilik toparlarynyň arasynda gatnaşyklar pugtalandyrylýar. Şeýle hem kinematografiýa we teatr sungaty ulgamynda gatnaşyklary has-da işjeňleşdirilýär.
Edil türkmenlerde bolşy ýaly, kiçini sylamak we ula sarpa goýmak ýaly sypatlar koreý halkynyň hem medeniýetiniň gözbaşynda durýar. Şeýle ýakynlyklary bolan iki halkyň arasynda üçünji müňýyllykda has ýakyn özara bähbitli gatnaşyklary ýola goýmagyň wajypdygyna, olary hil taýdan has belent derejä çykarmagyň zerurdygyna ýokary üns berilýär. Soňky ýyllarda Türkmenistanda Koreýanyň Medeniýet günleri we Koreýada Türkmenistanyň Medeniýet günleri yzygiderli geçirilýär.
Koreýa Respublikasynyň Prezidentiniň bu gezekki döwlet sapary-da köpasyrlyk dostlugyň berk binýadyna hem-de taryhy köklere esaslanýan türkmen-koreý gatnaşyklarynyň okgunly ösdürilmegine ýardam etmäge gönükdirilendir. Şeýle-de sapar iki döwletiň parlamentara gatnaşyklarynda, hem-de syýasy, ykdysady we medeni-ynsanperwer gatnaşyklarynyň taryhynda möhüm waka öwrüler.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.