Täze ýyl – şatlygyň baýramy
Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň saýasynda ata Watanymyzda şanly seneler, goşa-goşadan gelýän toýdur baýramlarymyz ýokary guramaçylykly ýagdaýda, uly şatlyk-şowhun bilen bellenilip geçilýär. Şeýle baýramlaryň hatarynda päk arzuwlary, ýagşy umytlary dabaralandyrýan şatlyk-gülküden püre-pür Täze ýyl baýramy hem özboluşlylygy bilen tapawutlanýar. Mähriban halkymyz Hemişelik Bitaraplygymyzyň şanly 30 ýyllygynyň dabaralanýan döwründe belent ösüşleri, rowaçly menzilleri nazarlap gelýän Täze – 2026-nji ýyly ýokary ruhubelentlikde, zähmet üstünlikleri, beýik ýeňişler bilen garşylaýar. Bu babatda ýurdumyzyň ähli künjeklerinde söwda merkezlerinde, ak bazarlarynda sowgatlyk harytlarynyň, azyk önümleriniň bolçulygy üpjün edilip, halkymyz üçin ýokary hilli baýramçylyk hyzmatlary ýola goýulýar. Dürli yşykdyr öwüşginli bezegler bilen bezelen paýtagtymyzyň Baş arçasy, köçeleri, gözel binalary ruhuňy göterip, şatlygyňa şatlyk goşýar. Bagtyýar halkymyz ýene-de sanlyja günden şanly wakalary özünde jemlän, şatlyga we buýsanja beslenen 2025-nji ýyly arka atar. Şunuň ýaly toýly günlerde hormatly Prezidentimiziň jöwher paýhasyndan dörän, täsin dürlerden doly ummany özünde jemleýän ajaýyp eseri bolan “Türkmenistanyň Bitaraplygy – parahatçylygyň we ynanyşmagyň aýdyň ýoly” atly kitabynyň elimize gelip gowuşmagy ähli türkmen halkynyň başyny göge ýetirdi, Täze ýyl baýramyna örän gymmatly, bahasyna ýetip bolmajak sowgat boldy. Türkmenistan ýurdumyzyň her bir ýyly ýaly, agzybir halkymyza ýatdan çykmajak bagtly pursatlary bagyş eden bu ýyl hem taryhyň sahypasynda mynasyp orun tutar. “Halkara parahatçylyk we ynanyşmak ýyly” ýatdan çykmajak şanly we taryhy wakalaryň ençemesini, möhüm sepgitli menzilleri ýadygär goýdy.
Goý, Täze ýyl eziz Watanymyza, türkmen halkyna üstünlik, şatlyk, bagt getirsin! Beýik şahyrymyz Kerim Gurbannepesowyň: Bu gün şatlyk gerek, bu gün saz gerek. Şowhun, gülki gerek. Ýaşasyn gülki! diýip belleýşi ýaly Täze ýyl her bir ynsana bagt paýlap, gülki eçilsin!
Şu pursatdan peýdalanyp bize şeýle ajaýyp döwri peşgeş beren Gahryman Arkadagymyzy, Arkadagly Gahryman Serdarymyzy, külli türkmen halkymyzy ýetip gelýän Täze ýyl baýramy bilen tüýs ýürekden gutlaýarys. Goý, Gahryman Arkadagymyzyň, Arkadagly Gahryman Serdarymyzyň janlary sag, döwlet bähbitli, umumadamzat ähmiýetli tutýan tutumly işleri elmydama rowaçlyklara beslensin!
Ogulnar GARRYGULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.