SUW DIPLOMATIÝASY WE NEKSUS SIMULÝASIÝASY BARADA SEMINAR GEÇIRILDI
2024-nji ýylyň 17-18-nji oktýabrynda Aşgabat şäheriniň “Arçabil” myhmanhanasynda Suw diplomatiýasy we NEKSUS simulýasiýasy barada seminar geçirildi.
Seminara Türkmenistanyň Suw hojalygy baradaky döwlet komitetiniň, Türkmenistanyň Bilim ministrliginiň, Türkmenistanyň Prezidentiniň ýanyndaky Döwlet gullugy akademiýasynyň, Türkmenistanyň Daşky gurşawy goramak we ýer serişdeleri baradaky döwlet komitetiniň Çöller, ösümlik we haýwanat dünýäsi milli institutynyň, Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň we ýurdumyzyň beýleki ýokary okuw mekdepleriniň wekilleri gatnaşdylar.
Geçirilen seminaryň maksady dünýäde we Merkezi Aziýada suw serişdeleriniň halkara-hukuk düzgünleşdirilmeginiň aýratynlyklaryny açyp görkezmekden, “suw hyzmatdaşlygy” düşünjesi bilen suw diplomatiýasynyň arabaglanyşygyny, şeýle hem suw diplomatiýasynyň esasy wezipelerini düşündirmekden ybaratdyr.
Agzalan seminar Merkezi Aziýanyň sebitleýin ekologiki meseleleri boýunça merkeziniň, ABŞ-nyň Halkara ösüş guramasynyň Suw we daşky gurşaw boýunça sebitleýin taslamasynyň, Türkmenistanyň Suw hojalygy baradaky döwlet komitetiniň bilelikde guramagynda geçirildi.
Seminaryň çäklerinde Türkmenistanyň Daşary işler ministrliginiň Halkara gatnaşyklary institutynyň talyplary bilen NEKSUS simulýasiýa oýny gurnaldy. Şeýle hem hünärmen suw serişdelerini we serhetüsti derýalary ulanmak boýunça Türkmenistanyň ikitaraplaýyn we köptaraplaýyn ylalaşyklarynyň üstünde aýratynlykda durup geçdi we bu temalar boýunça talyplaryň pikirlerini diňledi.
Suw diplomatiýasy boýunça geçirilen seminar örän täsirli bolup, oňa gatnaşyjylar özlerini gyzyklandyrýan sowallaryna jogap tapdylar.
Merjen DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň mugallymy.