HALK HÄKIMIÝETINIŇ AÝDYŇ NUSGASY
Rysgal-berekede beslenip gelen altyn güýzüň ilkinji günleriniň mylaýym şemaly ynsanlaryň kalbyna ýakymly duýgulary eçilýär. Ýoluň ugry bilen daş-töweregiňe gelşik berip duran daragtlary synlap barşyňa, olaryň ençeme gyşyň aňzagyndan, tomsuň jöwzasyndan geçip, belent başlaryny göge diräp duruşlary barada oýa batýarsyň. Olaryň şeýle berkliginiň, gözelliginiň aňyrsynda ene ýeriň çuňluklaryna uzap gidýän kökleriniň bardygy hakynda pikir öwürýärsiň. Elbetde, köki näçe berk boldugyça, daragt hem şonça mäkäm bolýar. Hyýalymyzda döwleti daragta meňzetsek, onda onuň köki halkdyr. Ýurduň kuwwatynyň, berkararlygynyň aňyrsynda bolsa halkyň agzybirligi, jebisligi, bitewüligi durandyr. Her ýyl mukaddes Garaşsyzlygymyzyň şanly toýunyň öňüsyrasynda geçirilmegi asylly däbe öwrülen Türkmenistanyň Halk Maslahatynyň mejlisi hem döwletimizde halk häkimiýetiniň, milli demokratiýanyň yzygiderli pugtalandyrylýandygyny doly aýdyňlygy bilen tassyklaýar.
Il arasynda ýörgünli «Geňeşli biçilen don gysga bolmaz», «Ýedi ölçäp, bir kes», «Ilim-günüm bolmasa, Aýym-Günüm dogmasyn», «Iliň güýji — siliň güýji» diýen ýaly nakyllardyr atalar sözlerinden görnüşi ýaly, müňýyllyklardan gözbaş alýan halkymyz islendik haýyrly işiň, döwletli tutumyň başyna baranda parasatly ýaşululara sala salýar, olaryň maslahatyna esaslanyp netije çykarýar. Dünýäniň akyldary Magtymguly Pyragynyň «Türkmeniň» atly şygryndaky: «Beg, töre, aksakgal — ýurduň eýesi» diýen setirleri-de halkymyzda ýaşuly nesle goýulýan hormat-sylagyň çeper beýanydyr.
Ýurdumyzda halk häkimiýetiniň iň ýokary wekilçilikli edarasy bolan Türkmenistanyň Halk Maslahaty milli ýörelgelerimiziň, asylly däp-dessurlarymyzyň Berkarar döwletiň täze eýýamynyň Galkynyşy döwründe Gahryman Arkadagymyzyň saýasynda, Arkadagly Gahryman Serdarymyzyň parasatly baştutanlygynda mynasyp dowam etdirilýändigini äşgär edýär. Müňýyllyklara uzaýan şöhratly taryhymyza ser salsak, 70-den gowrak döwleti berkarar eden milletimiz döwleti dolandyrmakda, il-ýurt ähmiýetli meseleler çözülende ýaşululardyr aksakgallar bilen maslahatlaşyp, halka sala salmagy asylly edähede öwrüpdir. Mysallara ýüzlensek, 1040-njy ýylda Daňdanakan söweşiniň öňüsyrasynda seljuk serdarlary Muhammet Togrul begiň, Dawut Çagry begiň beýik pir, dana akyldar hasaplanylýan Mäne babadan ak pata almaklary, «Edebiň ýagşysy ulyny syla» diýlişi ýaly, halkymyzyň il içinde sarpalanýan ynsanlar bilen maslahatlaşyp karara gelmegi, müwessa bilýändigini görkezýär. Bu barada Gahryman Arkadagymyz «Ömrümiň manysy» atly eserinde: «Mäne baba öz döwründe döwlet hökümdarlarynyň, baştutanlarynyň we wezir-wekilleriniň hem ýakyn maslahatçysy, geňeşdary, ruhy hemaýatçysy, doga-dilegçisi bolupdyr. Olar onuň ýanyna gelip, işleriniň rowaçlanmagy üçin ak pata, maslahat, öwüt-nesihat alypdyrlar» diýip jaýdar belleýär. Daňdanakan söweşinden soňra Merwde uly gurultaý geçirilip, onda Beýik Seljuk türkmen döwletiniň dörändigi jar edilýär. Ýokarda agzalanlardan hem görnüşi ýaly Türkmenistanyň Halk Maslahaty milletimiziň döwleti dolandyrmakda asyrlaryň dowamynda toplan baý tejribesine daýanyp, milli däp-dessurlarymyzyň mynasyp dowam etdirilýändiginiň aýdyň subutnamasydyr.
Esasy Kanunymyz bolan Konstitusiýamyzda hem kesgitlenilişi ýaly, Türkmenistanda jemgyýetiň we döwletiň iň ýokary gymmatlygy adamdyr. Adamy goramak, goldamak we oňa hyzmat etmek döwlet häkimiýet edaralarynyň baş wezipeleridir. Şoňa görä-de, Türkmenistanyň Halk Maslahaty jemgyýetiň döwlet dolandyrylyşyna gatnaşmagy üçin berk köpri hökmünde hyzmat edýär. Umumymilli forum il-ýurt bähbitli, döwlet ähmiýetli beýik tutumlary, döwlet durmuşyna degişli möhüm meseleler dogrusynda halka sala salmak, köpçülik bilen geňeşmek, olar bilen bagly ýaşulularyň, ýaşlaryň, jemgyýetiň dürli gatlaklaryndan wekilleriň tekliplerini ara alnyp maslahatlaşmak üçin ähmiýetli meýdançadyr.
Baş baýramymyz — mukaddes Garaşsyzlygymyzyň şanly 34 ýyllyk toýunyň öňüsyrasynda geçirilýän Türkmenistanyň Halk Maslahatynyň mejlisine taýýarlyk işleri ýokary depginde alnyp baryldy. Şunuň bilen baglylykda Milli Liderimiziň başlyklyk etmeginde 20-nji awgustda Türkmenistanyň Halk Maslahatynyň Prezidiumynyň mejlisi geçirildi. Onuň dowamynda umumymilli forumy hem-de Watanymyzyň hemişelik Bitaraplygynyň 30 ýyllyk baýramyny ýokary derjede geçirmek boýunça meseleleriň giň toplumy ara alnyp maslahatlaşyldy. Mejlisiň dowamynda Gahryman Arkadagymyz raýatlardan gelip gowşan tekliplere we beýleki ýüztutmalara garamak, olary hasaba almak, umumylaşdyrmak boýunça işleriň alnyp barylmalydygyny nygtady. Bu bolsa ýurdumyzda halk häkimiýetiniň berkidilmegi, jemgyýetiň Berkarar döwletiň täze eýýamynyň Galkynyşy döwründe durmuşa geçirilýän ägirt uly özgertmelere gatnaşmagy, halkyň sesiniň Türkmenistanyň Halk Maslahatynyň mejlisiniň belent münberinden ýaňlanmagy ugrunda döwlet derejesinde edilýän taýsyz tagallalaryň aýdyň subutnamasydyr.
Yhlas Hallyýew,
Türkmenistanyň Daşary işler ministrliginiň
Halkara gatnaşyklary institutynyň halkara žurnalistikasy hünäriniň talyby, «Esger».
Çeşme: «Esger» gazeti, 18.09.2025ý.
https://turkmenmetbugat.gov.tm/tk/newspapers/10/articles/208520