Germaniýada Türkmenistanyň Ykdysadyýet güni belleniler
Berkarar döwletiň täze eýýamynyň Galkynyşy döwründe ýurdumyz gün saýyn ösüşlere beslenýär. Hormatly Prezidentimiziň alyp barýan ynsanperwer dașary we içeri syýasaty netijesinde Türkmenistan döwletimiziň halkara abraýy günsaýyn belende galýar. Türkmenistan döwletimiz bilen ýakyn-alysdaky döwletler dost-doganlyk we özara bähbitli gatnaşyklary döwrebap ösdürmeklige işjeň gatnaşýarlar. Ýurdumyz Garaşsyzlyk alan ilkinji günlerinden bäri bu ýörelgäni şygar edip gelýär. Halkymyzyň parahatçylyk söýüjilik, adalatlylyk, ynsanperwerlik ýörelgelerine esaslanýan içeri we daşary syýasatymyz uly rowaçlyklara beslenýär. Türkmenistan döwletimiz özüniň daşary syýasaty ugrunda hoşniýetli goňşuçylyga, birek-birege sarpa goýmaga, deňhukuklylyga, özara peýdaly hyzmatdaşlyga esaslanýan oňyn bitaraplyk syýasatyndan ugur alyp dünýä ýurtlary bilen, abraýly halkara guramalary bilen ykdysady, syýasy, medeni, ylym-bilim we beýleki ugurlarda ygtybarly gatnaşyklaryň, halkara hyzmatdaşlygyň gerimini günsaýyn giňeldýär. Türkmenistan Germaniýa döwleti bilen halkara giňişlikde işjeň hyzmatdaşlyk edýärler, BMG-niň we beýleki iri halkara guramalaryň çäklerinde aýratyn ähmiýetli başlangyçlarydyr teklipleri ilerletmekde birek-biregi yzygiderli goldaýarlar. Türkmenistan we Germaniýa Federatiw Respublikasy oňyn syýasy-diplomatik gatnaşyklary ösdürmek bilen, söwda-ykdysady ulgamda, ýangyç-energetika toplumynda we beýleki pudaklarda netijeli hyzmatdaşlyk edýärler. Bu ugurlarda bar bolan kuwwatlyklary hasaba almak arkaly umumy tagallalaryň birleşdirilmegi has netijeli hasap edilýär. Germaniýanyň Ykdysadyýet komiteti habar bermegine görä, 2023-nji ýylyň 26-29-njy iýunynda Türkmenistanyň Söwda-senagat edarasynyň ýolbaşçylygyndaky ýokary derejeli wekiliýet Germaniýada saparda bolar. Döwlet we hususy pudagyň 35 wekili nemes maşyn gurluşykçylary we birleşikleri bilen bilelikde Dýusseldorfda Türkmenistanyň Ykdysadyýet gününi geçirer. Onda, esasan, nebithimiýa, gurluşyk we dokma senagaty boýunça hyzmatdaşlyk ara alyp maslahatlaşylar. Türkmenistanyň Ykdysadyýet gününiň esasy çäresi 2023-nji ýylyň 27-nji iýunynda Dýusseldorfyň Işewürler klubunda geçiriler. Türkmenistanyň wekiliýetiniň düzümine Türkmenistanyň Söwda-senagat edarasynyň ýolbaşçylary hem-de «Türkmengaz» döwlet konserniniň ýolbaşçysy şeýle hem Maliýe we ykdysadyýet ministrliginiň, Senagat we gurluşyk önümçilik ministrliginiň, Türkmenbaşydaky nebiti gaýtadan işleýän zawodlar toplumynyň, «Türkmenhimiýa» döwlet konserniniň, Döwlet haryt we çig mal biržasynyň wekilleri girer. Işewür wekiliýetiň düzümine «Ak-Bulut», «Mizemez», «Parahat», «Joş», «Ýörite Geýimler», «Galkynan Ykbal», «Geljege Rowan», «Daýanç Plastik», «Batly Gadam», «Berk Gerden», «Altyn Nal», «Uly Ýelken» ýaly kompaniýalaryň ýolbaşçylary we hünärmenleri girer. Türkmenistan we Germaniýa bar bolan mümkinçilikleri göz öňünde tutup, umumy tagallalaryň ulanylmagy iň täsirli hasaplanýan, söwda we ykdysady ugur, ýangyç we energetika toplumy we beýleki birnäçe pudaklarda öndürijilikli hyzmatdaşlyk edýärler. Halkara giňişliginde ýurdumyzy dünýä tanatmaga giň mümkinçilikleri döredip berýän Gahryman Arkadagymyzyň, Arkadagly Serdarymyzyň janlary sag, alyp barýan işleri elmydama rowaç bolsun!
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.
Şeýle hem bu bara şu ýerden okap bilersiňiz: