Dost-doganlygyň nyşany
Akyldar şahyrymyz Magtymguly Pyragynyň sarpasy daşary döwletlerde hem belentde tutulýar. Beýik şahyrymyzyň goşgularynyň dünýä alymlary tarapyndan öwrenilmegi, birnäçe dillere terjime edilmegi, şeýle-de dostlukly döwletlerde heýkelleriniň oturdylmagy aýratyn bellärliklidir. Şunuň bilen baglylykda, 2024-nji ýylyň 4-nji iýulynda Gazagystanyň paýtagtynda geçirilen Şanhaý Hyzmatdaşlyk Guramasynyň nobatdaky sammitiniň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Gündogaryň beýik şahyry we akyldary Magtymguly Pyragynyň Astanada gurlan ýadygärliginiň açylyş dabarasyna gatnaşmagy buýsançly taryhy wakalaryň hataryndan orun aldy. Munuň özi iki doganlyk halkyň medeni we ruhy gatnaşyklarynyň asyrlaryň jümmüşinden gözbaş alýandygyna aýdyň şaýatlyk edýär.
Milli Liderimiz açylyş dabarasynda eden çykyşynda «Pähim-paýhas ummany Magtymguly Pyragy» ýylynda akyldar şahyrymyzyň 300 ýyllyk toýy mynasybetli Astana şäherinde Magtymguly Pyragynyň ýadygärliginiň açylmagynyň dost-doganlygymyzyň ebedidigini hem-de mizemezdigini görkezýändigini aýtdy. Şunda golaýda Aşgabadyň ajaýyp künjeginde, gojaman Köpetdagyň eteginde «Magtymguly Pyragy» medeni-seýilgäh toplumynyň we beýik söz ussadynyň ýadygärliginiň, şeýle-de dünýäniň onlarça ýurdunyň görnükli şahsyýetleriniň heýkelleriniň açylyş dabarasynyň geçirilendigine aýratyn üns çekildi.
Dana Magtymgulynyň heýkeli şäheriň merkezinde, Turan köçesiniň ugrunda dikeldildi. Ýadygärligiň beýikligi 8,5 metre golaý bolup, Magtymguly Pyragynyň keşbi döredijilik bilen meşgullanýan ýaly görnüşde şekillendirilipdir. Ýadygärligiň ýanaşyk ýerleri abadanlaşdyrylyp, bagy-bossanlyga öwrülipdir. Dabara gatnaşyjylara Türkmenistanda gazak dilinde neşir edilen, Aşgabatda açylan täze «Magtymguly Pyragy» medeni-seýilgäh toplumyna bagyşlanan kitapçanyň gowşurylandygy bellärliklidir.
Bilşimiz ýaly, Magtymguly Pyragynyň geljek nesillere galdyran baý edebi mirasy bu gün umumadamzat gymmatlygyna öwrüldi. Dostlukly döwletde beýik akyldaryň heýkeliniň açylmagy iki halkyň arasyndaky dost-doganlyk gatnaşyklarynyň has-da pugtalanýandygynyň, birek-birege hormat goýlup, ata-babalarymyzyň gymmatly wesýetleriniň dowamat-dowam bolýandygynyň aýdyň nyşanydyr.
Bakydurdy GARAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby.