“Birleşen Milletler Guramasynyň nusgasy” atly akyl-paýhas bäsleşigi
2023-nji ýylyň 17-nji fewralynda Halkara ynsanperwer ylymlary we ösüş uniwersitetinde Türkmenistanyň diplomatik işgärleriniň güni mynasybetli “Birleşen Milletler Guramasynyň nusgasy” atly akyl-paýhas bäsleşigi geçirildi. Türkmenistanyň Bilim ministrliginiň geçiren bu bäsleşigine Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň, Ýagşygeldi Kakaýew adyndaky Halkara nebit we gaz uniwersitetiniň talyplary gatnaşdylar.
Bäsleşigiň esasy maksady her ýylyň 18-nji fewralynda ýurdumyzda giňden dabaralandyrylýan Türkmenistanyň diplomatik işgärleriniň gününiň öň ýanynda geçirilip, talyp ýaşlara Birleşen Milletler Guramasynyň Baş Assambleýasynyň işiniň gidişi, onda kabul edilýän maksatnamalar, BMG-niň düzümindäki ýolbaşçylaryň hem-de işgärleriň wezipeleri we jogapkärçiligi, ylalaşyklaryň gazanylyşy baradaky giňişleýin düşünjeleri bermek, şeýle-de ýaşlaryň dil bilimini hem-de dilewarlygyny ösdürmekden ybarat bolup durýar.
Bu akyl-paýhas bäsleşigine gatnaşan talyplaryň hersi Birleşen Milletler Guramasyna agza döwletleriň Doly ygtyýarly wekili hökmünde şol döwletleriň milli bähbitlerini gorap çykyş etdiler. Bäsleşigiň dowamynda halkara gatnaşyklaryndaky meseleler barada pikir alyşylyp, teklipler ara alnyp maslahatlaşyldy. Çykyşlar esasynda Türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynyň talyplarynyň taýýarlan ýörite Kararnamasy, beýleki gatnaşyjylaryň biragyzdan ses bermegi bilen kabul edildi.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.