Arzuwlarym wysal boldy...
Biziň Garaşsyz, baky Bitarap ýurdumyzda ýaş nesliň ylymly, bilimli bolmagy ugrunda Türkmen halkynyň milli Lideri Gahryman Arkadagymyzyň we Arkadagly Serdarymyzyň ýolbaşçylygynda uly tagallalar edilýär. Maňa hem her güni şanly senelere beslenýän «Arkadag Serdarly bagtyýar ýaşlar ýylynda» Türkmenistanyň abraýly ýokary okuw mekdepleriniň biri bolan Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň talyby bolmak bagty miýesser etdi. Häzirki döwürde ata Watanymyz Türkmenistan bilen goňşy döwletleriň şeýle hem uzak Gündogar we Ýewropa döwletleriniň arasyndaky özara bähbitli hyzmatdaşlyk günsaýyn ösýär. Men döwletimiziň bütin dünýä meşhur taryhy, türkmenleriň döreden we dolandyran döwürlerinde medeniýetiň, siwilizasiýanyň ösmegi, gadymy döwürlerden başlap türkmenleriň Orta Aziýanyň dürli künjeklerinde döreden döwletlerinde hökümdarlaryň alyp baran diplomatik usullary bilen içgin gyzyklanýaryn. Meniň bu gyzyklanmalarym Berkarar döwletiň Täze eýýamynyň Galkynyşy döwründe ýurdumyzda mekdep okuwçylarynyň arasynda geçirilýän «Altyn asyryň Altyn zehinleri» atly ders bäsleşigine taryh dersinden gatnaşmagyma itergi berdi. 2022-nji ýylda bu bäsleşigiň mekdep, etrap we welaýat tapgyrlarynda üstünlikli çykyş edip, I orna, döwlet tapgyrynda bolsa, II baýrakly orny eýelemegi başardym. Türkmenistanyň Daşary işler ministrliginiň Halkara gatnaşyklary institutynyň garamagynda döredilen Ýaş diplomatlar mekdebiniň gurnamagynda geçirilýän «Parahatçylygyň ýaş çaparlary» atly akyl-paýhas bäsleşiginiň II möwsüminiň 3-nji oýnuna gatnaşmagym meniň kämilleşmegime getirdi. Men Türkmenistanyň Daşary işler ministrliginiň Halkara gatnaşyklary institutynyň giriş synaglaryny üstünlikli tabşyryp, talyplyk bagtyna eýe boldum.
Biz ýaşlaryň ylym-bilim almagy ugrunda giň mümkinçilikleri döredip berýän Gahryman Arkadagymyza, Arkadagly Serdarymyza köp sagbolsun aýdýaryn. Goý Gahryman Arkadagymyzyň, Arkadagly Serdarymyzyň janlary sag, belent başlary aman bolsun!
Begmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.