Hormatly Prezidentimiz ýurdumyzyň ylym-bilim ulgamyny ösdürmeklige, ony kämilleşdirmeklige aýratyn üns berýär. Bu ugurda kabul edilýän kararlar, ajaýyp çözgütler türkmen ýaşlarynyň çuňňur bilim alyp, ökde hünärmen bolup ýetişmekleri üçin uly ýardam edýär.
Men hem ýurdumyzda zehinli ýaşlary ýüze çykarmak maksady bilen geçirilýän birnäçe bäsleşiklere uly höwes bilen gatnaşdym. 2024-nji ýylda men türkmen halkynyň Milli Lideri, Gahryman Arkadagymyzyň ýörite Karary esasynda Türkmenistanyň Daşary işler ministrliginiň Halkara gatnaşyklary institutynyň düzüminde döredilen Ýaş diplomatlaryň mekdebiniň gurnamagynda mekdep okuwçylarynyň arasynda geçirilen «Parahatçylygyň ýaş çaparlary» atly akyl-paýhas bäsleşiginiň “Beýik Magtymguly Pyragynyň taglymaty – umumadamzat gymmatlyklarynyň milli şamçyragy” atly şygar astynda geçirilen III möwsüminiň Baş baýragyna hem-de Göçme kuboga mynasyp boldum. 2023-2024-nji okuw ýylynda “Altyn asyryň altyn zehinleri” ady bilen mekdep okuwçylarynyň geçirilen arasynda ders bäsleşiginiň welaýat tapgyrynda iňlis dili dersi boýunça 3-nji orna mynasyp bolmagy başardym.
“Pähim-paýhas ummany Magtymguly Pyragy” ýylynda talyp bolmak bagtynyň maňa-da miýesser edendigine begenjimiň çägi ýok. Magtymguly Pyragynyň doglan gününiň 300 ýyllygynyň giňden bellenilýän ýylynda şeýle uly bagta miýesser bolmak meniň durmuşymda ýatdan çykmajak wakalaryň biri boldy. Giriş synaglaryndan üstünlikli geçip, maňa Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň talyby bolmak bagty miýesser etdi. «Hünärli hor bolmaz» diýlişi ýaly, hünär ynsanyň ýaraşygydyr. Berkarar döwletiň täze eýýamynyň Galkynyşy döwründe Hormatly Prezidentimiz her bir raýatyň saýlan hünäriniň hakyky eýesi bolmagyna, öz ukyp-başarnygyny açyp görkezmegine giň mümkinçilikleri döredip berýär. Men hem Arkadagly Gahryman Serdarymyzyň ýaşlara bildirýän uly ynamyny ödäp, saýlap alan hünärim boýunça kämil bilim alyp, ilimize-günümize gerekli hünärmen bolup ýetişmegi öz öňümde maksat edip goýýaryn.
Ýurdumyzda her bir ýaş nesliň öz öňünde goýan maksadyna ýetmegi, ylymly-bilimli bolmagy üçin ähli şertleri döredip berýän türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza köp sagbolsun aýdýarys. Gahryman Arkadagymyzyň, hormatly Prezidentimiziň janlary sag, ömürleri uzak bolsun, beýik tutumly işleri elmydama rowaçlyklara beslensin!
Aýlar JUMAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby,
«Parahatçylygyň ýaş çaparlary» atly akyl-paýhas bäsleşiginiň
III möwsüminiň baş baýragynyň eýesi.
Şeýle hem bu barada şu ýerden okap bilersiňiz: