“Zenan kalby - gözelligiň nusgasy” atly wagyz-nesihat maslahaty geçirildi
2022-nji ýylyň 27-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Zenanlar birleşiginiň Aşgabat şäheriniň Berkararlyk etrap zenanlar bölümi bilen institutyň talyp gelin-gyzlarynyň bilelikde gatnaşmagynda “Zenan kalby - gözelligiň nusgasy” atly wagyz-nesihat maslahaty geçirildi. Wagyz-nesihat maslahatynda institutyň okuw işleri boýunça prorektory G.Ýusupowa, Türkmenistanyň Magtymguly adyndaky Ýaşlar guramasynyň Berkararlyk etrap geňeşiniň sanly ulgam boýunça esasy hünärmeni O.Sapardurdyýewa, mährem ene S.Ataýewa, Türkmenistanyň Saglygy goraýyş we derman senagaty ministrliginiň Aşgabat şäheriniň 7-nji saglyk öýüniň maşgala lukmany Ş.Ýegelekowa dagy çykyş etdi.
Maslahatyň dowamynda halkymyzyň asyrlaryň dowamynda toplan ene-mamalarymyzdan miras galan milli däp-dessurlary mynasyp dowam etdirmek, maşgala ojagyna wepalylyk, asyllylyk, zähmetsöýerlik, arassa ahlaklylyk ýaly häsiýetleri terbiýelemek, tebigy gözelligi aýap saklamak, milli mirasymyza bolan sarpany kemala getirmek hem-de ösdürmek ugrundaky işleri ýaýbaňlandyrmak boýunça baý mazmunly çykyşlar edildi.
Altyn BABYŞOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.