Zehin bäsleşiginiň netijeleri
«Halkyň Arkadagly zamanasy» diýlip yglan edilen 2022-nji ýylyň 21-nji fewralynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň gurnamagynda ýurdumyzyň we Garaşsyz Döwletleriň Arkalaşygyna agza döwletleriň ýokary okuw mekdeplerinde halkara gatnaşyklary ugrundan okaýan talyplarynyň arasynda Türkmenistanyň diplomatik işgärleriniň güni mynasybetli «Rus dili – milletara gatnaşyklaryň we diplomatiýanyň dili» atly rus dili boýunça zehin bäsleşiginiň jemleri jemlenip, sylaglandyryş dabarasy geçirildi. Zehin bäsleşigiň maksady talyplaryň döredijilik başarnyklaryny ýüze çykarmakdan, olaryň ukyplaryny artdyrmakdan, BMG-niň resmi dilleriniň hem-de diplomatiýanyň ýörgünli dilleriniň biri hökmünde rus dilini öwrenmäge bolan höwesini artdyrmakdan, rus diliniň leksiki we grammatiki ulgamlaryny özleşdirmekden, talyplaryň arasynda rus dilinde ýazuw endiklerini ösdürmekden ybaratdyr.
Hemmämiziň bilşimiz ýaly, rus dili häzirki wagtda dünýäde iň işjeň ulanylýan dilleriň biri hasaplanylýar. Ýurdumyz syýasy taýdan Garaşsyzlygyny gazanan ilkinji günlerinden bäri ýaşlaryň mekdep partasyndan başlap, ene dili bolan türkmen dili bilen birlikde rus we iňlis dillerini hem bilmekleri döwlet maksatnamasyna girizildi. Şu nukdaýnazardan hem biziň ýokary okuw mekdebimizde geçirilýän şeýle çäreleriň ähmiýeti örän ýokarydyr.
Adalatly emin agzalarynyň netijelerine görä, «Rus dili – milletara gatnaşyklaryň we diplomatiýanyň dili» atly rus dili boýunça zehin bäsleşiginde Belarussiýa Respublikasynyň Baranowiçskiý döwlet uniwersitetiniň 2-nji ýyl talyby Ermek Kubanow 3-nji orna, Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 5-nji ýyl talyby Anwar Esedow 2-nji orna, institutyň Halkara gatnaşyklary fakultetiniň 4-nji ýyl talyby Jemal Rematullaýewa 1-nji orna, şeýle hem şol fakultetiniň 3-nji ýyl talyby Serdar Rahymow Baş baýraga mynasyp boldular.
Şeýle-de Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby Annaberdi Kaşaňow, şol fakuletiň 2-nji ýyl talyby Gunça Hamedowa, Halkara hukugy fakultetiniň 3-nji ýyl talyby Döwlet Babakuliýew, Halkara gatnaşyklary fakultetiniň 4-nji ýyl talyby Laçyn Hojaýewa dagylar höweslendiriji orna mynasyp bolmagy başardylar.
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby.