ÝUNISEF-niň Ýaşlaryň klimat boýunça tomusky mekdebi tamamlandy
Birleşen Milletler Guramasynyň Çagalar Gaznasynyň (ÝUNISEF) klimat üýtgemeleri, durnukly ösüş we ýaşlar liderligi boýunça ýaşlaryň bilimlerini hem-de amaly başarnyklaryny ösdürmäge gönükdirilen tomusky mekdebi üstünlikli geçirildi. Türkmenistanyň Bilim ministrligi hem-de Türkmenistanyň Daşky gurşawy goramak ministrligi bilen hyzmatdaşlykda guralan bu okuw maksatnamasyna ýurdumyzyň dürli künjeklerinden 16 ― 25 ýaş aralygyndaky ýaşlaryň ençemesi, şol sanda türkmen diplomatiýasynyň milli mekdebiniň talyplary hem gatnaşdylar.
Tomusky mekdebiň dowamynda gatnaşyjylar klimat üýtgemeleri, suw serişdelerini durnukly dolandyrmak, biodürlüligi gorap saklamak, çölleşmä garşy göreşmek, durnukly şäherleri ösdürmek we galyndylary dolandyrmak ýaly ugurlar boýunça okuw sapaklaryna, interaktiw duşuşyklara, toparlaýyn taslamalara hem-de amaly okuwlara gatnaşdylar.
2026-njy ýylyň tomusky mekdebi BMG-niň Klimatyň üýtgemegi baradaky Çarçuwaly konwensiýasynyň (COP) resmi ýaşlar platformasy bolan YOUNGO tarapyndan goldanylýan Ýaşlaryň Milli maslahatyna taýýarlyk tapgyry bolup hyzmat etdi. Gatnaşyjylar COP31 maslahatyna hödürlenjek Milli ýaşlar beýannamasynyň taýýarlanmagyna öz goşantlaryny goşdular. Şeýle hem olar klimat boýunça bilimlerini we amaly endiklerini kämilleşdirip, özara tejribe alyşdylar. Hünärmenleriň gatnaşmagyndaky okuwlar, amaly sapaklar, toparlaýyn işler we okuw saparlary arkaly ýaşlar klimat hem-de daşky gurşaw bilen bagly möhüm meseleleri öwrenip, bu ugurda möhüm başlangyçlary taýýarladylar.
Bu halkara bilim maksatnamasynyň çäginde Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 2-nji ýyl talyby Medine Jeýhunowa üç aý dowam eden okuw sapaklaryny üstünlikli tamamlap, ÝUNISEF-iň ýörite güwänamasy bilen sylaglandy. Munuň özi geljekki halkaraçy hünärmenleriň bilim-tejribelerini kämilleşdirmekde möhüm ähmiýete eýedir.
Aýbölek SÜLEÝMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby