ÝUNISEF bilen hyzmatdaşlykda geçirilen okuw maslahaty
2025-nji ýylyň 30-njy aprelinde Türkmenistanyň Daşary işler ministrliginiň
Halkara gatnaşyklary institutynda Birleşen Milletler Guramasynyň Çagalar
gaznasynyň (ÝUNISEF) Türkmenistan boýunça 2021–2025-nji ýyllar üçin
Maksatnamasyny durmuşa geçirmek maksady bilen Türkmenistanyň Zähmet we
ilaty durmuş taýdan goramak ministrligi bilen hyzmatdaşlykda Türkmenistanyň
ýokary okuw mekdepleriniň talyp ýaşlarynyň gatnaşmagynda okuw maslahaty
geçirildi. Maslahatyň dowamynda gatnaşyjylar ÝUNISEF-iň ýurdumyzda amala
aşyrýan çäreleriniň ähmiýeti, çagalara gönükdirilen durmuş goragy, olaryň
hukuklaryny üpjün etmek we geljekki mümkinçilikleriň ösdürilmegi boýunça
meseleler dogrusynda pikir alyşdylar.
Maslahatyň dowamynda Türkmenistanyň Daşary işler ministrliginiň Halkara
gatnaşyklary institutynyň Halkara ykdysady gatnaşyklary kafedrasynyň
mugallymy Amanmyrat Myradow çykyş edip, ÝUNISEF bilen hyzmatdaşlygyň
çäklerinde ilatyň, aýratyn-da çagalaryň durmuş derejesini ýokarlandyrmak,
hukuklaryny goramak we mümkinçiliklerini giňeltmek boýunça alnyp barylýan
işleriň ähmiýeti barada çykyş etdi. Şeýle-de bu çärede geljekki ýyllarda bu ugurda
meýilleşdirilýän hyzmatdaşlygyň mümkinçilikleri ara alnyp maslahatlaşyldy.
Laçyn ANNAÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň
3-nji ýyl talyby.