Ylmy – amaly maslahat geçirildi
2025-nji ýylyň 23-nji iýunynda Türkmenistanyň Daşary işler ministrliginiň Halkara gatnaşyklary institutynda Medeniýet we sungat işgärleriniň hem-de Magtymguly Pyragynyň şygryýet güni mynasybetli “Magtymguly Pyragynyň şygryýet dünýäsi – medeni-ynsanperwer ulgamynda halkara hyzmatdaşlygynyň ösüşi” atly ylmy-amaly maslahat geçirildi. Maslahata institutynyň professor mugallymlary we talyp ýaşlary, şeýle-de Türkmenistanyň Döwlet, hukuk we demokratiýa institutynyň işgärleri gatnaşdylar.
Ylmy-amaly maslahatda bitaraplyk, parahatçylyk, ynanyşmak ýörelgeleri we milli medeniýet, türkmen-hytaý medeni gatnaşyklarynda Magtymguly Pyragynyň orny, Halkara parahatçylyk we ynanyşmak ýylynda medeni diplomatiýanyň ähmiýeti, Magtymguly Pyragynyň goşgularynda dünýewilik we diplomatiýa barada çykyşlar diňlenildi.
Umumy mejlisden soň ylmy-amaly maslahat “Magtymguly Pyragynyň döredijiliginiň dünýä möçberindäki ähmiýeti”, “Medeniýet – jemgyýetiň ruhy durmuşynyň ýörelgesi”, “Türkmenistanyň medeni – ynsanperwer gatnaşyklaryny ösdürmekde ykdysady diplomatiýanyň tutýan orny”, “Magtymguly Pyragynyň edebi mirasy – türkmen halkynyň milli ruhynyň egsilmez çeşmesi” atly bölümçelerde öz işini dowam etdi.
Maslahatyň ahyrynda oňa gatnaşyjylar türkmen halkynyň taryhyny, özboluşly medeniýetini, däp-dessuryny ösdürmekde giň mümkinçilikleri döredip berýän Gahryman Arkadagymyza, hormatly Prezidentimize alkyş sözlerini beýan etdiler.
Ogulnar GARRYGULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.