Ykdysady diplomatiýa ugry boýunça okuw sapagy
2022-nji ýylyň 17-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda ykdysady diplomatiýasy ugry boýunça nobatdaky okuw sapagy geçirildi. Okuw sapagyny institutyň Halkara ykdysady gatnaşyklary kafedrasynyň uly mugallymy Mährijemal Mämedowa alyp bardy. Bu okuw sapagy «Globallaşma ýagdaýlarynyň ykdysady diplomatiýa edýän täsiri» atly tema boýunça geçirildi. Okuw sapagynyň dowamynda häzirki döwürde döwletleriň daşary syýasatynyň ykdysady ugry bolan ykdysady diplomatiýanyň globallaşma ýagdaýyndaky täsiri, ykdysady diplomatiýa döwletiň daşary syýasatynyň we onuň alyp barýan halkara işjeňliginiň düzüm bölegini emele getirýär, häzirki taryhy döwürde globallaşma ýurduň ykdysady ösüşini üpjün etmekdäki wajyp orny, ähmiýeti dogrusynda giňişleýin gürrüň berildi. Okuw sapagynyň dowamynda talyp ýaşlar mugallyma özlerini gyzyklandyrýan sowallar bilen ýüzlendiler.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.